Минск моторҙар заводы Башҡортостанда двигателдәр йыясаҡ

Был турала “Минск моторҙар заводы” акционерҙар йәмғиәте етәкселеге Рәсәйҙең Беларусь Республикаһындағы Сауҙа вәкиллегендә Башҡортостан вәкиле Константин Климин менән осрашыуҙа һөйләшеп килеште. Башҡортостан Хөкүмәте хәбәр итеүенсә, предприятие беҙҙең республикала төрлө модификациялы двигателдәр, дизель-һурҙырғыстар һәм дизель-генераторҙар йыйырға әҙер. Был эш урындағы предприятиелар менән берлектә башҡарыласаҡ. “Беларусь Республикаһы Башҡортостандың төп партнерҙарының береһе булып тора һәм Беларусь предприятиелары араһында беҙҙең компаниялар менән хеҙмәттәшлек итергә теләүселәр артыуын күреү һәйбәт тойғо ҡалдыра. Башҡортостандың бер нисә предприятиеһы ла Минск моторҙар заводы менән республикабыҙ биләмәһендә двигателдәр һәм генераторҙар етештереү менән ҡыҙыҡһыныуын белдерҙе, әле ошо мәсьәлә менән шөғөлләнәбеҙ”, – тине Башҡортостандың тышҡы иҡтисади бәйләнештәр һәм конгресс эшмәкәрлеге министры Маргарита Болычева. Фото: Башҡортостан Хөкүмәте сайтынан.