“Йәйғор”ҙоң яңы балҡышы

Әбйәлил районы Асҡар ауылының мәҙәниәт һарайында талантлы режиссер Илүзә Шәйәхмәтова етәкселек иткән “Йәйғор” халыҡ театры артистары тамашасыларҙы премьера менән ҡыуандырҙы. Улар йәш яҙыусы Рәшит Зәйнуллиндың пьесаһы буйынса “Өмөт тыуған миҙгел” спектаклен ҡуйҙы. Спектакль баштан уҡ та­ма­ша­сының иғтибарын йәлеп итте. Хәл-ваҡиғалар ҡарттар йортонда бара. Йәшәйеше­беҙ­ҙең аяныслы пробле­маһын асып һалған сәхнә әҫәре ҡартайған көндәрендә бер кемгә лә кәрәкмәгән, үҙ балалары баш тартҡан атай һәм әсәй­ҙәрҙең ҡыҙғаныс яҙмышын сағылдырҙы. Ғүме­ре буйы дәүләткә бил бөгөп, балалар үҫтергән өлкән бы­уындың бөгөн килеп ҡәҙер­һеҙгә әйләнеүе – ғибрәтле хәл. Ғәзиз балалары килеп алып ҡайтыр урынға, ейән­дәрен бер һөйөп алыуға зар-интизар булған әсәлә­ренән йортон һатыуға ризалыҡ биргән ҡултам­ғаһын алып китеүе рухи ҡиммәттәрҙе матди байлыҡ алыштырыуын, ялтыра­уыҡлы тормош артында насар ҡылыҡтар ятыуын асып һала. Шундай саҡта ла ололарҙың үҙ балаларына яҡшы тормош те­ләүе, бер кемгә лә рәнйемәүе һоҡландыра. Ҡарттар йортонда ла һәр көндөң яҡшы яғын табып, бер-береһенең хәстәрҙәрен, шатлыҡтарын уртаҡлашып йәшәйҙәр, яманлыҡтарҙан ҡурсалай­ҙар. Уларҙың шулай бер ғаилә булып йәшәүе, үҙҙә­ренең яҡындарынан ала алмаған күңел йылыһын тап бында тойоуҙары фәһемле булды. Ниңә спектакль “Өмөт тыуған миҙгел” тип атала? Бер ҡараһаң, ҡарттар йортонда көн иткән һәм, үҙҙәре әйтмешләй, бер аяҡтары менән теге донъяға аяҡ баҫҡан әбей-бабайҙарҙың ниндәй йыуанысы булһын?! Тик тап яҡты өмөт, иртәгәһе көндәре яҡшыраҡ булыр тип ышаныу уларҙы йәшәтә, тормоштан төңөлөргә ирек бирмәй. Үлем менән йәшәү араһының ҡылдай нәҙек булғанын һиҙгән ололар шулай яңы көнгә ҡыуаныс менән баға, һәр миҙгелен ҡәҙерләргә ынтыла. Мансур Баһаув, Буранбай Һөйәр­ғолов, Фирғәт Мәтинов, Гөлнур Носратова, Фәнүзә Илһамова, Резида Шаһимәр­ҙәнова, Әнүзә Абдуллина, Марат Фәттәхов ролдәрҙе бирелеп баш­ҡарҙы, тамашасы улар менән бергә йәшәне, уй-кисерештәрен уртаҡ­лаш­ты, ҡыйынлыҡтарына уйланды, бәләкәй генә ҡыуаныс­тарына үҙенекеләй шатланды. Бында иһә ҡуйыусы режиссер Илүзә Мөҙәрис ҡы­ҙының һәр кемгә тура кил­гәндәй роль һайлауы, профессиональ театр вәкиле булмаған ябай хеҙмәт кешеләрен, хаҡлы ялдағы ололарҙы сәхнәлә үҙҙәрен иркен тоторға өйрәтеүе маҡтауға лайыҡ. Һәүәҫкәр актерҙар спек­таклдә бер тулҡында уйнаны, тамашасы күңеленә әҫәргә һалынған төшөн­сәләрҙе етке­реүгә иреште. Тәрбиәүи яҡ­тан бик фә­һемле, ҡатмарлы әҫәрҙе сығарыу ҙур көс, ныҡыш­маллыҡ талап итә. Уны юғары кимәлгә еткереү, талапсан тамашасының зауы­ғына тап килтереү өсөн оҙайлы, күмәк хеҙмәт һа­лын­ғаны асыҡ күренде. Спектакл­дең уңышында сәхнәгә декорация ҡуйыусы рәссам Гөлирә Нафиҡо­ваның, музыкаль яҡтан биҙәүсе Динис Фәхрет­диновтың тырыш­лығы ла ята. Әйткәндәй, зал тултырып килгән тамашасылар “Йәйғор”ҙарҙың һәр спектаклен көтөп алып, ал­ҡыштарға, гөлләмәләргә күмә, был юлы ла премьераны йылы, ихлас ҡабул иттеләр. Премьераға пьесаның авторы Рәшит Зәйнуллин­дың килеүе театр артистарына уғата яуаплылыҡ өҫтәне. Ул спек­такл­гә яҡшы баһа бирҙе, режиссерға һәм артистарға рәхмәт һүҙҙәрен еткереп, улар­ға ижади уңыштар теләне. “Йәйғор”ҙар үҙҙәренең таланты менән йәнә йәй­ғорҙай балҡыны, тиеү артыҡ булмаҫ. Коллектив был спектакль ме­нән ауылдарға ла сығасаҡ. Фәһемле, уй­ландырырлыҡ спектаклде күрмәй ҡалмағыҙ, тип әйтке килә. - Динара САФИУЛЛИНА