3 апрелдән 7-һенә тиклем Шишмә районының Ҡара Яҡуп ауылында «Мәктәп туҡланыуы аҙнаһы» тип исемләнгән сара үтте. Был хаҡта ойштороусылар социаль селтәрҙә ентекле яҡтыртып барҙы. «Мәктәптә һәм өйҙә сәләмәт туҡланыу», был аҙнала мәктәп эсендә лә, унан тыш та сәләмәт туҡланыуға арналған бик мөһим нәмәләр тураһында һөйләшелде, тип яҙҙы. Балаларға ашнаҡсының етди профессия булыуы хаҡында еткерелде, дөрөҫ туҡланыу сәләмәтлектең нигеҙе икәнлеген белде балалар һәм милли ризыҡтарыбыҙ менән танышты. Уҡыусылар дөрөҫ туҡланыуға арналған был сарала ихлас ҡатнашты. Мәҫәлән, 8-се класс уҡыусылары ашнаҡсы Екатерина Мухкулова ярҙамында милли ризығыбыҙ - ҡош телен бешерергә өйрәнде. Башҡорттарҙың милли аш һыуы ғорурлыҡ булып, өҫтәлдәрҙе һәр саҡ биҙәп тороуын төшөндө уҡыусылар. Башланғыс кластар «Минең яратҡан аҙығым» тигән рәсем конкурсында әүҙем ҡатнашты. Бәләкәстәр һәр береһе үҙенең иң яратҡан ашын ҡағыҙ битенә төшөрҙө. Ә 5-7-се кластар «Беҙ дөрөҫ туҡланыу яҡлы тигән плакаттар эшләп элде. Мәктәптә дөрөҫ туҡланыу сараһы сиктәрендә, район мәғариф идаралығында түңәрәк өҫтәл булды. Унда райондың мәктәп директорҙары, мәктәптәрҙә туҡланыу өсөн яуаплылар, ата-әсәләр комитеты вәкилдәре ҡатнашты. Һөйләшеү йәнле һәм һөҙөмтәле барҙы. Белем усаҡтарындағы әлеге меню, балаларҙың мәктәптә, өйҙә нисек туҡланыуына иғтибар ителде. Ата-әсәләр был темаларға ҡағылышлы үҙҙәрен борсоған күп һорауҙарына яуап алдылар. Файҙалы ла, ҡыҙыҡлы ла, фәһемле лә был сара «Сәләмәт мин – сәләмәт ғаилә!» флешмобы менән тамамланды. Фотолар: "Мәктәптә һәм өйҙә дөрөҫ туҡланыу"ҙан.