ՌԴ գլխավոր դատախազությունը հանձնարարել է Մոսկվայի դատախազությանը ստուգել երգիչ Վալերի Մելաձեին Ուկրաինայի Զինված ուժերի ֆինանսավորման համար: Այս մասին ТАСС-ին հայտնել են իրավապահ մարմինները։
«Ներկայումս Մոսկվայի դատախազությանը հանձնարարվել է Մելաձեի նկատմամբ ստուգում անցկացնել՝ Ուկրաինայի զինված ուժերին ֆինանսական օգնություն ցուցաբերելու համար», - ասել է գործակալության զրուցակիցը՝ մանրամասնելով, որ համապատասխան հանձնարարականը ստացվել է Ռուսաստանի գլխավոր դատախազությունից:
«Անվտանգության և կոռուպցիայի դեմ պայքարի դաշնային նախագիծ» հասարակական կազմակերպության ղեկավար Վիտալի Բորոդինն ավելի վաղ դիմել էր գլխավոր դատախազ Իգոր Կրասնովին՝ երգչի նկատմամբ համապատասխան ստուգում անցկացնելու խնդրանքով: Նա նշել է, որ երգիչը բազմիցս հանդես է եկել Ուկրաինայում հատուկ ռազմական գործողության քննադատությամբ, ինչպես նաև ԱՄԷ-ում կորպորատիվ երեկույթի ժամանակ արտասանել է ուկրաինացի ազգայնականների կարգախոսը:
Մարտի վերջին հաղորդվել էր, որ երգիչ Վալերի Մելաձեի ծրագրված համերգները Կրասնոյարսկում, Իրկուտսկում, Նովոսիբիրսկում, Բառնաուլում, Կեմերովոյում եւ Դոնի Ռոստովում չեղյալ են հայտարարվել: