Хәрби хәрәкәттәр ветерандары һәм махсус хәрби операцияла ҡатнашыусылар Башҡортостан райондарында урындағы власть вәкилдәре, ауыл биләмәләре активы, контракт буйынса хәрби хеҙмәткә кандидаттар менән осрашыуҙар үткәрә. Күптән түгел Күгәрсен, Ейәнсура һәм Йылайыр райондарында ла ошондай саралар ойошторолдо. Күгәрсен районы хакимиәтендә акция сиктәрендә ҡунаҡтар потенциаль кандидаттарға хәрби хеҙмәттең абруйы, хәрби хеҙмәткәрҙәрҙең контракт буйынса алған перспективалары, социаль гарантиялары тураһында һөйләне. – Быға тиклем беҙ күбеһенсә ғәмәлдәге частарҙы комплектлау менән шөғөлләндек, ә 1 апрелдән ирҙәрҙе ирекле батальондарға һайлай башлайбыҙ. Беҙҙең алға ҡуйылған планды беҙ һәр ваҡыт үтәйбеҙ. Мораҡ һәм Йомағужа ауылдарында эшләй башлаясаҡ мобиль пункттарға таратыу материалдары (памяткалар, буклеттар һәм башҡалар) таратыласаҡ, шулай уҡ бөтә кәрәкле мәғлүмәт урынлаштырыласаҡ. Унда БР Йыйылыу пунктында уҡыу үткән волонтерҙар эшләйәсәк. Йәмәғәт ойошмаларын да йәлеп итәбеҙ. Хәрби комиссариат хеҙмәткәрҙәре ойошмаларҙа һәм ауыл биләмәләрендә хәрби иҫәп алып барыусы белгестәр менән берлектә потенциаль кандидаттар исемлеген һайланы һәм аныҡланы. Ауыл хакимиәттәре башлыҡтарына урындарҙа ошо категорияға ҡараған кешеләр менән аңлатыу эштәре алып барырға кәрәк. Бәлки, кемдер хеҙмәттең үҙенсәлектәре тураһында белмәгәндер һәм Ватанды һаҡларға теләк белдергәндер. Контрактҡа ҡул ҡуйыу – ирекле эш, быға бер кемде лә мәжбүр итмәйәсәктәр, – тине Ришат Фаат улы. “Башҡортостан Республикаһының ветерандар ойошмалары берләшмәһе” ассоциацияһының башҡарма секретары Хәйрәт Таҡтаев Афған һуғышын үткән. 30 йылдан ашыу ул йәмәғәт эштәре менән шөғөлләнә. – Армия иҫәбен арттырыу эше барғанын аңларға кәрәк. Рәсәйҙең Ҡораллы Көстәренә юғары квалификациялы белгестәр кәрәк. Республикабыҙҙан ирекле батальондар составында махсус хәрби операцияла ҡатнашырға теләүселәр байтаҡ. Уларға һәр яҡлап ярҙам итергә тырышабыҙ. Һәр муниципалитетта дөйөм бурысҡа ҡушылған ветерандар ойошмалары эшләй, уларға ла кәңәш һорап мөрәжәғәт итергә була, – тине Хәйрәт Рәшит улы. Хәрби хеҙмәтте контракт буйынса үтеү шарттары тураһында ентекләберәк Өфөнән килгән ҡунаҡ, граждандарҙы һайлап алыу пункты инструкторы Максим Кох һөйләне. Уның һүҙҙәренсә, буласаҡ хәрби хеҙмәткәрҙәр өсөн документтар пакетын әле ябайлаштырғандар. Уларҙың иң мөһимдәрен генә (ғариза, автобиография, анкета, ИНН, СНИЛС, фотоһүрәттәр, никах теркәүе, балалар тыуыу тураһындағы таныҡлыҡтар) йыйырға кәрәк. – Әгәр граждан Башҡортостан батальондарында хеҙмәт итергә теләй, әммә унда вакантлы вазифалар юҡ икән, уны резервҡа ҡуялар. Башҡа урындарға граждандың ризалығынан тыш ебәрелмәйәсәк. Бөгөн махсус хәрби операцияла ҡатнашыусы 180 мең һумдан башлап аҡса ала. Эш хаҡын ваҡытында ала, өҫтәүенә уларҙың ташламалары ла бар. Түләү системаһының айырмаһы булыуы мөмкин. Илебеҙ территорияһында урынлашҡан башҡа хәрби частарҙы ла һайларға мөмкин. Уларҙың ҡайһы берҙәренең бер нисә айға ҡыҫҡа ваҡытлы контрактҡа ҡул ҡуйыу мөмкинлеге бар, – тип һөйләне Максим Сергеевич. Кәңәшмәлә ҡатнашыусылар үҙҙәрен ҡыҙыҡһындырған һорауҙарҙы бирә һәм уларға яуап ала алды. Егеттәрҙән, асылда, бер нәмә генә талап ителә – аныҡ хәрби һөнәр буйынса кәрәкле белем һәм практик оҫталыҡҡа эйә булыу, һуңынан, запасҡа сыҡҡандан һуң, илдең мобилизация резервы сафында билдәле бер урын биләү. Шуға күрә уларҙың күбеһе хәрби хеҙмәтте рядовой составта үтә. Контракт буйынса хәрби хеҙмәткә килеп, кешеләр тотороҡлолоҡто, үҙ-үҙеңде күрһәтеү өсөн киң мөмкинлектәрҙе, лайыҡлы тормош кимәлен һәм юғары социаль статусты һайлай. Әгәр һеҙ Ватанды һаҡлаусылар сафына баҫырға теләһәгеҙ, урындағы власть, хәрби комиссариат вәкилдәренә ҡыйыу мөрәжәғәт итә алаһығыҙ. Улар һеҙгә кәрәкле мәғлүмәтте шәхсән еткерә. Азамат Ғәҙелшин. Фото: Башинформ.