"Беҙҙең хәрби-уҡыу үҙәге – илдә иң яҡшыларҙың береһе"

7 апрелдә Башҡортостан Башлығы Радий Хәбиров Өфө фән һәм технологиялар университетының хәрби-уҡыу үҙәгендә булды. Был - республикала студенттарының Рәсәй Ҡораллы Көстәре һөнәрҙәре буйынса әҙерлек алған берҙән-бер юғары уҡыу йорто. Төбәк етәксеһе махсус хәрби операция ваҡытында һәләк булған Өфө дәүләт авиация техник университетын тамамлаған лейтенант Артур Саяповтың мемориаль таҡтаташына сәскә һалды. Герой үлгәндән һуң Батырлыҡ ордены менән бүләкләнгән. Радий Хәбиров офицерҙарға һәм һалдаттарға белем биреү программалары менән дә танышты. Хәрби әҙерлек үҙәге начальнигы Евгений Сотников хәрби-уҡыу үҙәгендә меңдән ашыу курсанттың шөғөлләнеүе тураһында һөйләне. Уҡытыусылар составына 27 ғәмәлдәге офицер һәм 13 запастағы офицер инә. Үҙәк эшмәкәрлек алып барған осорҙа, шул иҫәптән Өфө дәүләт авиация техник университеты составында, 19 мең хәрби белгес әҙерләгән. Уның сығарылыш уҡыусылары Рәсәй Һауа-космос көстәрендә хеҙмәт итә. Уларҙың күбеһе махсус хәрби операция үткәреү зонаһында хәрби бурыстар үтәй. Хәрби-уҡыу үҙәге ҡарамағында айырым уҡыу корпусы һәм строй үткәреү майҙаны бар. Авиация техникаһын үҙләштереү буйынса дәрестәр ҡаланан ситтә урынлашҡан аэропорт лаборатория-һынау комплексы базаһында урынлашҡан уҡыу-күнекмә аппаратураһы бүлегендә үткәрелә. Шунда уҡ курсанттарҙың дөйөм хәрби әҙерлек дисциплиналары буйынса практик күнекмәләрен һәм оҫталыҡтарын үҙләштергән тактик ялан бар. Радий Хәбиров авиация ҡоралдары, вертолет конструкциялары һәм радиоэлектрон ҡорамалдар кластарында, методик кабинетта булды, шулай уҡ музей мөйөшөн һәм заманса ҡорал күргәҙмәһен ҡараны. Евгений Сотников аңлатыуынса, юғары уҡыу йортоноң хәрби юғары уҡыу йортонан төп айырмаһы шунда: курсанттар дөйөм университет мөхитендә йәшәй һәм уҡый. Офицерҙар программаһы буйынса маҡсатлы уҡыуҙы тамамлаған сығарылыш уҡыусылары Рәсәй Хәрби-һауа көстәрендә өс йыллыҡ хәрби хеҙмәт үтә. Уларҙың географияһы бөтә хәрби округтарҙы һәм Төньяҡ флотты үҙ эсенә ала. Запастағы офицерҙарҙы әҙерләүҙе төп белем биреү программаһы менән параллель алып барабыҙ. Бында инеү өсөн студенттарҙың яҡшы уҡыуы һәм физик яҡтан ныҡлығы булырға тейеш. Йомғаҡлау аттестацияһынан һәм ант ҡабул иткәндән һуң авиация частарының береһендә уларҙы лейтенант хәрби званиеһы менән запасҡа алалар. Теләһә, сығарылыш уҡыусылары контракт хеҙмәтенә лә инә ала, – тип өҫтәне Евгений Сотников. 2014 йылдан хәрби-уҡыу үҙәгендә запастағы һалдаттарҙы ла әҙерләй башлайҙар. Теоретик һәм уҡыу йыйылыштарынан һуң хәрби частарҙа студенттарҙы запасҡа “рядовой” хәрби званиеһы менән алалар. Курстарҙың тулы программаһын үҙләштереүҙе уларға хәрби хеҙмәткә саҡырыу буйынса иҫәпләйҙәр. – Беҙҙең хәрби-уҡыу үҙәге – илдә иң яҡшыларҙың береһе. Бында хәрби самолеттар һәм вертолеттар менән эшләү буйынса юғары класлы белгестәр әҙерләнә. Шуныһы мөһим, Башҡорт дәүләт университеты һәм Өфө дәүләт авиация техник университеты берләшкәндән һуң үҙәк бөтә ҙур Өфө фән һәм технологиялар университеты студенттары өсөн эшләй башланы, – тип билдәләне Радий Хәбиров. Фото һәм мәғлүмәт сығанағы: glavarb.ru