Իտալացի տենոր Ալեսսանդրո Սաֆինան մայիսի 18-ին ելույթ կունենա Երևանում՝ Եվրասիական տուրի շրջանակներում, հայտնում է ZartonkMedia-ն։
Սաֆինան ելույթ կունենա Երևանի Կարեն Դեմիրճյանի անվան մարզահամերգային համալիրի բեմում՝ սիմֆոնիկ նվագախմբի նվագակցությամբ։ Համերգը նրա Եվրասիական շրջագայության շրջանակներում է։ Աշխարհահռչակ իտալացի տենորը կկատարի ինչպես նոր ստեղծագործություններ, այնպես էլ հայտնի հիթեր, որոնք նրան ճանաչում են բերել։
Սաֆինան մանկուց տարված է եղել երաժշտությամբ։ 17 տարեկանում ընդունվել է Ֆլորենցիայի կոնսերվատորիա, իսկ մի քանի տարի անց որպես մենակատար հանդես է եկել Եվրոպայի լավագույն երաժշտական թատրոններում։ Երգիչը երրորդ անգամ կայցելի Հայաստան համերգով։ Նրա առաջին համերգը Երևանում կայացել է 2011 թվականին, իսկ երկրորդը՝ 2022 թվականին։