Күпләп ҡарабойҙай һәм борсаҡ сәсәсәкбеҙ

Башҡортостандың ауыл хужалыҡтары яҙғы баҫыу эштәренә тотондо. Ғәҙәттәгесә, миҙгел баҫыуҙарҙа ужым иген культураларын һәм күп йыллыҡ үләндәрҙе туҡландырыуҙан башлана. 31 мартҡа Ҡыйғы, Ауырғазы, Благовар, Бүздәк, Дүртөйлө, Илеш, Ҡырмыҫҡалы, Мәләүез, Стәрлетамаҡ һәм Саҡмағош райондары ауыл эшсәндәре баҫыу эштәренә тотонған. “Республикала ауыл хужа­лыҡтары ужым культураларын һәм күп йыллыҡ үлән­дәрҙе туҡландырыуға сыҡты, был төбәктең төньяҡ-көнсы­ғы­шы, атап әйткәндә, Ҡыйғы районы хужалыҡтары баҫыуҙарҙа тәүгеләрҙән булып эш башланы”, – тип билдәләне Баш­ҡортостан Хөкүмәтенең вице-премьеры – ауыл хужалығы министры Илшат Фәзрахманов. – Дөйөм алғанда, төбәктә 2 мил­лион 170 мең гектарҙан ашыу майҙанда яҙғы сәсеү эштәре планлаштырылған. Ужым культуралары 319 мең гектар самаһында сәселгән, был бер йыл элеккегә ҡарағанда 56 мең гектарға күберәк. Шул уҡ ваҡытта ужым культура­ла­рының 94 проценты яҡшы һәм ҡәнәғәтләнерлек хәлдә. Яҙғы иген культураларын 1 миллион 440 мең гектарҙан ашыу майҙанда сәсергә план­лаш­тырабыҙ. Ҡарабойҙай һәм бор­саҡ майҙандары арттырыласаҡ. Техник культуралар менән майҙандар 7,8 мең гектарға артасаҡ, тәү сиратта шәкәр сөгөлдөрө һәм майлы культуралар сәсеүлектәрен арттырыу иҫәбенә, – тип белдерҙе министр. Иген үҫтереү буйынса республикала алдынғы урындарҙа торған Илеш районында ла баҫыу эштәре ҡайнай. – “Үҙәк” МТС-ының Илеш фи­лиалы, “Урал” яуаплылығы сикләнгән йәмғиәте, М. Гәрәев исемендәге хужалыҡ тәүге­ләрҙән булып күп йыллыҡ үләндәрҙе һәм ужым культураларын туҡландыра башланы. Район хужалыҡтарына быйыл 69 мең гектарҙан ашыу майҙанда яҙғы сәсеү үткәрергә тура килә, шул иҫәптән техник культуралар – 4522 гектар, мал аҙығы культуралары – 18,1 мең гектар, кукуруз – 5665 гектар һәм игенгә кукуруз 195 гектар майҙанды биләргә тейеш. Башҡа хужалыҡтарға ла эште тиҙләтергә һәм башларға кәрәк, сөнки юҡҡа ғына мәҡәлдә “яҙғы көн йылды туйҙыра” тип әйтелмәгән. Ауыл эшсәндәренә уңыштар һәм уңайлы һауа торошо теләйем! Хәйерле сәғәттә! – тине Илеш районы хакимиәте башлығы Илдар Мостафин. - Рәмилә МУСИНА