Татарстан Республикасы Рәисе Рөстәм Миңнеханов Молдовага кертелмәгән, шуның аркасында ул Комрат шәһәрендә «Халыклар дуслыгы-2023» I Халыкара халык дипломатиясе конгрессында катнаша алмады. Бу хакта Gagauznews хәбәр итә.«Гагаузиянең Халык җыены депутаты, Gagauz Halk Birlii иҗтимагый-сәяси хәрәкәте рәисе Виктор Петров һәм Молдова парламентында Гагаузиядән депутат Александр Суходольский белән зур уртак программа әзерләдек. Кызганыч, Молдава хакимияте без бу илгә килергә хокукы булмаган гражданнар булып торабыз дигән карар кабул итте. Шуңа күрә без конгресста катнаша алмыйбыз», - ди Рөстәм Миңнеханов Молдовадан очып китү алдыннан.Татарстан Рәисе Гагаузия халкын Пасха белән котлый, Виктор Петровка һәм аның хезмәттәшләренә эшләрендә уңышлар тели. «Бездә яхшы традицияләр. Татарстан халкы һәм Гагаузия халкы – тугандаш халыклар. Соңгы елларда без элемтәдә идек, һәм безнең алга таба үсештә үзара ярдәм итешү буенча зур планнарыбыз бар. Виктор Петров җитәкчелегендәге яшь команда Русия белән Татарстан арасында яхшы бәйләүче звенога әверелер дип ышанам», - ди ул.Рөстәм Миңнеханов һәм «Ак Барс» холдинг компаниясе» акционерлар җәмгыяте генеральный директоры Иван Егоров Кишиневка халык дипломатиясе конгрессында катнашу өчен махсус сәфәр белән барганнар. Александр Суходольский ТАССка сөйләгәнчә, Татарстан Рәисенә «самолеттан төшәргә дә ирек бирмәгәннәр». «Илгә керүне тыю турында язылган документ тапшырдылар», - дип ачыклык кертә Молдава парламентарие.Быел мартта Виктор Петров җитәкчелегендәге Гагаузия делегациясе (анда катнашучылар арасында Александр Суходольский да бар иде) Казанга килде. Автономия вәкилләре Рөстәм Миңнеханов белән сәүдә-икътисади элемтәләрне үстерү, агросәнәгать комплексы, медицина һәм фармацевтика, IT һәм башка юнәлешләр турында фикер алышты, дип яза Татар-информ.