"Мәрхәмәтлелек концертын бөгөн һигеҙенсе ауылда ҡуябыҙ"

Борон-борондан халҡыбыҙ мираҫы булған ғәмәлдәр бар: изгелек ҡылыу, хәлеңдән килгәнсә башҡаларға ярҙам ҡулын һуҙырға ынтылыу. Әле лә республикабыҙҙағы һәр кем ҡулынан килгәнсә махсус хәрби операцияла ҡатнашҡандарға ярҙам итергә тырыша. Тап ошондай ҡатмарлы ваҡытта кемдең кем икәнлеге асыҡлана ла. Һәр саҡтағыса республикабыҙҙа йәшәүселәр, шул иҫәптән бөрйәндәр ҙә был изге эшкә ҡушылды. Мәҫәлән, сығышы менән Байназар ауылынан булған Айрат Роберт улы Баязитов тыуған районы ауылдары буйлап мәрхәмәтлелек концерты ойошторорға ҡарар иткән. – “Йәшәү дәрте арта күңелемдә, йөрәгемдә моңдар яралһа!” тип исемләнгән мәрхәмәтлелек концертын ете ауыл мәҙәниәт йортонда уңышлы ҡуйып ҡайттыҡ. 25 мартта Байназар ауылында башлап ебәргәйнек, унда 10 мең һум аҡса йыйылды. Концертта ҡатнашҡан ижадташ дуҫтар дәрт итеп, күрше ауылдарға барайыҡ тип ниәтләп, Мораҙымда – 5500, Мәһәҙейҙә – 6000, Яуымбайҙа – 3500, Яңы Монасипта – 5000, Ғәлиәкбәрҙә 7000 һәм Килдеғолда 6500 һум йыйып, тулайым 43500 һумды махсус хәрби операцияла ҡатнашҡан районыбыҙҙың ир-егеттәренә ярҙамға күсереп ҡуйыуға өлгәштек, – ти Айрат Роберт улы. – Бөтә яҡтан яҡшы эштәргә йүнәлтеүсе әсәйемә, туғандарыма – Азамат ағайыма, Айһылыу апайыма, Рәсимә еңгәйемә, Гөлназ һеңлемә, концертты музыкаль яҡтан биҙәүсе тауыш операторы Урал Ниязғоловҡа, үҙе талантлы йырсы Артур Нәжметдиновҡа, Байназар ауылы биләмәһе ветерандар советы рәйесе Сәғит Алтынбаевҡа, презентация, афишалар менән ярҙам итеүсе Айгүзәл Уразаеваға, Булат Тимерғәлиевкә, йылы алҡыштар менән ҡаршы алған хөрмәтле тамашасыларға ҙур рәхмәт. Бынан тыш, бер концерттан да ҡалмай ҡатнашҡан “Ағиҙел тулҡындары” инструменталь ансамбле сараға дәрт, дарман өҫтәгән: Дилара Иманғолова, Вәдүт Алтынбаев, Әлфир Хәсәнов, Рәмзиә һәм Фаил Үтәбаевтар, Әнүзә Ибраһимова, Әлфирә Сөләймәнова, Зәлиә Тулыбаева, оҫта ҡурайсы Ғәзим Ғәлиуллин һәм һүҙ оҫтаһы, ансамбль етәксеһе Нажиә Ишҡыуатованың сығышы һәр кемгә оҡшаған. – Коллектив дәррәү йыйылды, кәрәк саҡта машиналары, үҙ юлы менән дә ихлас күңелдән барып ҡатнаштылар, – ти Айрат Баязитов. Тамашасылар республика бейеү конкурстары лауреты Дилбәр Хәкимованың сығышын йылы алҡыштар менән ҡаршы алған. Моңло йырсылар Таңһылыу Нурғәлина, Мәйсәрә Миңдеғолова һәм Садиҡа Вәлиеваның сығышы ла һәр кемгә оҡшаған. – Ауылдар буйлап турҙарҙа йөрөгән осорҙа йәм өҫтәп өр-яңы “Моңло шишмә” ҡатын-ҡыҙҙар вокаль ансамбле барлыҡҡа килде, – тип ҡыуаныслы яңылығы менән уртаҡлашты Айрат Роберт улы. Шуныһы ҡыуаныслы: барыһы ла мөмкинлектәре булғанда, алыҫ араларҙы яҡын итеп, ҙур теләк менән концерттарҙы үткәреүҙә ҡатнаша. Республика конкурстары лауреаттары баянсы, ҡурайсы, йырсы композитор Хәйҙәр Нәҙершин һәм оҫта бейеүсе Фәнис Үтәбаев, сараның һәр бер өлөшөнә тура килтереп шиғыр, матур һүҙҙәре менән биҙәгән Нурзилә Исмәғилева – ана шундайҙарҙан. Фәтих Миндиғолов үҙенең машинаһы менән музыкаль аппаратура алып барышҡан. Тағы шуныһы үҙенсәлекле: сараны хуплап, Бөрйән районы хакимиәтенең мәҙәниәт бүлеге етәксеһе Клара Теләүбаева, район мәҙәниәт һарайы директоры Гөлнур Нәҙершина, Ветерандар советы рәйесе Олег Ғәлиев, юл төҙөү-төҙөкләндереү идаралығы мөдире Руслан Динисламов һәм башҡалар һәр йәһәттән ярҙам итә. – Ошо концерттарҙы ойоштороуҙа күрһәткән ярҙамдары өсөн һәммәһенә лә оло рәхмәтемде еткерәм. Һеҙҙең һәр бер изге эшегеҙҙә уңыштар ғына юлдаш булһын! Оҙон ғүмер, шатлыҡ, ҡыуаныстар теләйем! Махсус хәрби операциялағы ир-егеттәр имен-һау ғына тыуған яҡтарына әйләнеп ҡайтһын! – ти Айрат Баязитов. Һәр башланғысҡа нигеҙ ғаиләлә һалына. Айраттың атаһы Роберт Ишдәүләт улы ла йырларға яратҡан. Ҡыҙғанысҡа ҡаршы, бынан дүрт йыл элек ул яҡты донъяларҙан китеп барған. Әсәһе Әминә Тимерғаҙыҡ ҡыҙы, апайҙары Айгөл, Айһылыу, ағайҙары Азамат менән Салауат та сәнғәткә ғашиҡ. – Аллаға шөкөр, әсәйем дә, Айһылыу апайым менән Азамат ағайым да концерттарҙа ҡатнашты, – ти Айрат Баязитов. Бөгөн “Йәшәү дәрте арта күңелемдә, йөрәгемдә моңдар яралһа!” тип исемләнгән концерт Яңы Усман ауылында бара. Айрат Баязитов ижадташ дуҫтары менән тағы бер нисә ошондай концерт ойоштормаҡсы. Был мәҙәни сараларҙан йыйылған аҡса махсус хәрби операцияла ҡатнашҡан Бөрйән районы егеттәренә ярҙамға китәсәк. Фотолар: Айрат Баязитовтың шәхси архивынан