Күмертауҙа социаль-иҡтисади мәсьәләләр тураһында һөйләштеләр

18 апрелдә Башҡортостан Хөкүмәте Премьер-министры Андрей Назаров Күмертауҙа ҡаланың социаль-иҡтисади үҫеше буйынса эшлекле кәңәшмә үткәрҙе. Сарала вице-премьерҙар, министрлыҡтар һәм ведомстволар етәкселәре ҡатнашты. Андрей Назаров бөгөн ҡала хакимиәте менән булған ҡыйынлыҡтарҙы хәл итеү мөмкинлектәре тураһында һөйләшеүҙең төп мәсьәлә икәнлеген һыҙыҡ өҫтөнә алды. Тәнҡитләү түгел, ярҙам итеү, тип хәбәр итте республика Хөкүмәтенең матбуғат хеҙмәте. - 2021 йылдың февралендә ҡаланың көнүҙәк проблемалары тураһында һөйләшергә йыйылғайныҡ. Ул ваҡытта аныҡ фармандар бирелгәйне. Бөгөнгә барыһы ла үтәлә, - тине Премьер-министр. Шулай итеп, ЗАГС бинаһында капиталь ремонт атҡарыласаҡ. Бынан тыш, Көйөргәҙе районы менән Күмертау ҡалаһы араһында автобустар йөрөтөү һәм башҡалар тураһында ине. Дөйөм алғанда, барлығы 25 фарман бар һәм улар эштә. Башҡортостан Хөкүмәте Премьер-министрының беренсе урынбаҫары – иҡтисади үҫеш һәм инвестиция сәйәсәте министры Рөстәм Моратов ҡаланың социаль-иҡтисади хәле тураында тулыраҡ һөйләне. Ул 2016 йылдан ҡаланың йылдам үҫеш биләмәһе булыуын хәтергә төшөрҙө. Социаль-иҡтисади үҫеш перспективаларын ҡарағанда Андрей Назаров Эшҡыуарлыҡ һәм туризм министрлығына Күмертау ҡалаһы эшҡыуарҙары өсөн квартал һайын сығып ҡабул итеү үткәреү, ҡала хакимиәтенә ағымдағы йылда йылдам үҫеш биләмәһенә өстән кәм булмаған резидентты йәлеп итеү, Иҡтисади үҫеш һәм инвестиция сәйәсәте министрлығына йыл һөҙөмтәләре буйынса инвестициялар үҫешен 10 проценттан да кәм булмаған үҫеште, Мәғариф һәм фән министрлығына “Күмертау авиация етештереү предприятиеһы” акционерҙар йәмғиәте менән пилотһыҙ осоу аппараттар операторҙарын уҡытыуҙы ойоштороу мәсьәләһен тәьмин итергә ҡушты. Сәнәғәт үҫеше тураһында Башҡортостан Хөкүмәте Премьер-министры урынбаҫары – сәнәғәт, энергетика һәм инновациялар министры Александр Шельдяев сығыш яһаны. Уд “КүмАПП” менән “Ойлтиммаш”тың ҡала өсөн мөһим предприятиелар икәнлеге хаҡында әйтте. Андрей Назаров, былтыр, иҡтисади һәм сәйәси факторҙар ҡатмарлы булһа ла, “КүмАПП”тың тотороҡло эшләүе хаҡында һөйләне. Былтыр 9 миллиард һумлыҡ продукция ташылған. Был, 2021 йыл менән сағыштырғанда, 16 процентҡа күберәк. Был йылға ла предприятие заказдар менән тәьмин ителгән. - Анализ күрһәтеүенсә, авиация техникаһына көс ведомстволары заказ бирә, әммә гражданлыҡ йүнәлешен дә үҫтерергә кәрәк. Тап шуға предприятиеның етештереү ҡеүәтендә “БАС-200” перспективалы пилотһыҙ системаларҙы етештереү тураһында ҡарар ҡабул ителде. Сәнәғәт, энергетика һәм инновациялар министрлығына Рәсәйҙең Ғәҙәттән тыш хәлдәр министрлығына “КүмАПП” компанияһы продукцияһын файҙаланыуҙы ҡарау мөмкинлеге менән мөрәжәғәт итергә кәрәк, - тине Хөкүмәт Премьер-министры. Артабан йәмәғәтселек биләмәләрен төҙөкләндереү һәм торлаҡ-коммуналь хужалыҡ системаһы үҫеше тураһындағы мәсьәләләр ҡаралды. Йылылыҡ менән тәьмин итеүгә килгәндә, Премьер-министр төп теманың береһе Күмертау йылылыҡ-электр станцияһы өлкәһендәге мәсьәләләр икәнлеге тураһында белдерҙе. Юл-урамдар сиселеше һәм уларҙың үҫеше тураһында ла һөйләшеү булды. Премьер-министрҙың эшлекле сәфәренең аҙаҡҡы һорауы мәғариф инфраструктураһы үҫеше темаһы булды. Был хаҡта тулыраҡ мәғариф һәм фән министры Айбулат Хажин һөйләне. Эшлекле сәфәргә йомғаҡ яһап, Андрей Назаров вице-премьерҙарға, министрлыҡтар һәм ведомстволар етәкселәренә Күмертау ҡалаһының социаль-иҡтисади үҫешенең төп йүнәлештәренә етди иғтибар бүлергә ҡушты. Фото, сығанаҡ: pravitelstvorb.ru/news/20729/