Ҡыҙғанысҡа ҡаршы, республикала янғындар сығыу осраҡтар туҡтамай. Иң аяныслыһы шул: утта кеше ғүмерҙәре өҙөлә. Ғәҙәттән тыш хәлдәр министрлығының Башҡортостан буйынса идаралығынан хәбәр итеүҙәренсә, кисә Ҡариҙел районы Ҡараяр ауылында янғын сыға. Ут сығыуы тураһында хәбәр алынғас та, ваҡиға урынына Ҡараяр ауыл биләмәһенең ирекле янғын һүндереү командаһы һәм янғын һүндереүселәр ашыға. "Ҡыҙыл әтәс" ике фатирлы йортто тотош ауыҙлыҡлап алған була. Уны һүндереү барышында 1953 йылғы ирҙең һәләк булыуы асыҡлана. Шулай уҡ төндә Нефтекама ҡалаһының Энергетик ҡасабаһында ла фажиғәле хәл теркәлгән. Күп ҡатлы йорттарҙың береһендә янғын сыға. Ут бишенсе ҡаттың бер фатирын ялмап ала. Йорттоң подъезы төтөнгә тула, 12 кеше үҙаллы фатирҙарынан сыға ала, шуның икәүһе - балалар. Был юлы 1952 йылғы ҡатындың кәүҙәһе табыла. Ике осраҡ буйынса ла тикшереү бара, янғын сығыу сәбәптәре асыҡлана. Ут менән һаҡ булығыҙ! Фото: "Башинформ".