Торахан мавзолейы эргәһендә “Хәтер баҡсаһы” барлыҡҡа киләсәк

Ғәҙәттәгесә, дүртенсе тапҡыр Рәсәй Президенты Владимир Путиндың ҡушыуы буйынса “Хәтер баҡсаһы” акцияһы үткәрелә. Уның маҡсаты – Бөйөк Ватан һуғышы йылдарында һәләк булған һәр кем иҫтәлегенә 27 миллион төп ағас ултыртыу. Быйыл сара яңы мәғәнәгә эйә булды һәм әлеге ваҡытта илебеҙҙең намыҫын һәм дәрәжәһен яҡлаған геройҙарға ярҙам итеү маҡсатында үткәреләсәк. Башҡортостандың урман хужалығы министры Марат Шәрәфетдинов билдәләүенсә, өс йыл эсендә төбәктә 3,3 миллиондан ашыу ағас ултыртылған, ә акцияла ярты миллиондан ашыу кеше ҡатнашҡан. – “Хәтер баҡсаһы” акцияһы республикабыҙ өсөн яҡшы йолаға әүерелде. Башҡортостан бөтә ил менән бергә ата-бабалар иҫтәлеген хөрмәтләй. Йыл һайын акцияға меңәрләгән кеше ҡушыла: уҡыусылар, юнармеецтар, кадеттар, ирекмәндәр, урман тармағы хеҙмәткәрҙәре, студенттар, – тине урман ведомствоһы етәксеһе. Ағымдағы йылда проект сиктәрендә Башҡортостанда ауылдарҙы йәшелләндереү һәм дәүләт урман фонды ерҙәрендә ағастар ултыртыу буйынса саралар 22 апрелдән 22 майға тиклем үтәсәк. Акцияны үткәреү өсөн республикала урман хужалыҡтары һәм урмансылыҡ хеҙмәткәрҙәре һәр муниципалитет биләмәһендә 100-гә яҡын участка әҙерләгән, шул иҫәптән 72-һе – урман фондында, уларҙа 700 меңгә яҡын яңы ағас ултыртыласаҡ. Акцияның берҙәм стилен формалаштырыу өсөн төбәк өсөн яраҡлаштырылған брендбук эшләнгән. “Хәтер баҡсаһы” акцияһының рәсми сайтында онлайн карта урынлаштырылған һәм илдең бөтә төбәктәренә төшөү нөктәләре төшөрөлгән, шулай уҡ ағастарҙы ултыртыуҙа нисек ҡатнашыу тураһында ентекле тасуирлама бирелгән. Бөтә урындарҙа ла ултыртыу датаһы һәм ваҡыты, ултыртылған ағастарҙың төрө, координаторҙың бәйләнеш мәғлүмәттәре күрһәтелгән. Республика халҡы, интерактив карта ярҙамында үҙҙәренә уңайлы локация һайлап, акцияға ҡушыла ала. Акцияла ҡатнашыусыларҙың барыһы ла тейешле үҫентеләр һәм эш ҡоралдары менән тәьмин ителәсәк. Быйыл Шишмә районында урта быуаттар тарихы ҡомартҡыһы – Торахан мавзолейы эргәһендәге участка үҙәк майҙансыҡ буласаҡ. 29 апрелдә бында урман һыҙаты ултыртыу планлаштырыла, сарала ҡатнашыусылар меңдән ашыу ҡайын ултыртасаҡ. Төбәктең урман хужалығы министры Марат Шәрәфетдинов Башҡортостан Башлығы Радий Хәбиров етәкселегендәге оператив кәңәшмәлә сығыш яһағанда “Йәшел Башҡортостан” республика акцияһының бер өлөшө булараҡ “Хәтер баҡсаһы” проектының әһәмиәтен билдәләне. Марат Шәрәфетдинов сығышында ул экологик йүнәлешле, шулай уҡ ата-бабаларыбыҙҙың бөйөк батырлығы иҫтәлегенә ағастар ултыртыу, шулай уҡ яңы геройҙарҙың – махсус хәрби операцияларҙа ҡатнашыусыларҙың ҡаһарманлыҡтарын мәңгеләштереү маҡсатын билдәләне, улар ҙа шундай уҡ хөрмәткә һәм шул уҡ хәтергә лайыҡ. Республика халҡын һәм ҡунаҡтарын экологик-патриотик акцияға әүҙем ярҙам итергә һәм унда ҡатнашырға саҡырабыҙ, йәшел һәйкәлдәр ултыртыу, “Хәтер баҡсаһы” лозунгыһы аҫтында тематик аллеялар һалыу традицияһын дауам итәбеҙ. Сөнки һәр кем һәләк булған геройҙарҙы хөрмәтләп, тыуған яҡ урмандарын һаҡлауға үҙ өлөшөн индерә ала. Шуны билдәләп үтергә кәрәк, ағымдағы йылға 14,8 мең гектар майҙанда, шул иҫәптән 6,7 мең гектар майҙанда урман тергеҙеү эштәрен башҡарыу буйынса план билдәләнгән. Был эште Башҡортостандың Урман хужалығы министрлығы “Экология” милли проектының “Урмандарҙы Һаҡлау” төбәк проектын тормошҡа ашырыу сиктәрендә башҡара. Фото: culture.ru.