Район хакимиятенең авыл хуҗалыгы бүлеге җитәкчесе Ришат Баһманов Бүздәктә икенче язгы чәчүен үткәрә. Вазыйфага үткән елның апрелендә билгеләнгән җаваплы җитәкче район хуҗалыклары белән ныклап танышырга өлгергән, әлбәттә. Алай гына да түгел, аларның быелгы кыр эшләренә яхшы әзерлектә килүен дә тәэмин итә алган, дип әйтергә нигез бар. Моны Әмир авылында Айнур Хәбиров крестьян-фермер хуҗалыгында үткәрелгән чәчү алды район киңәшмәсе дә раслады. Тоташ алганда, Бүздәк аграрийлары язгы басуга ныклы әзерлектә һәм зур максатлар белән чыкты. — Ашлыкның сату хаклары түбән калса да, икмәк тәме искермәгәндәй, игенче өчен амбарның тулы булуы кыйммәт, чөнки уңайлы шартларда аны барыбер сатып җибәреп була, — ди Ришат Таһир улы. — Шуңа быел да төп максат булып ашлык җитештерүне арттыру тора. Кыр эшләре барышында барлык эшчәнлек шуңа юнәлтелгән. Чәчү әйләнешендә дә чагылыш таба бу. Мәсәлән, агымдагы елда район хуҗалыкларының чәчү мәйданы 72 мең гектардан күбрәк тәшкил итә – бу үткән елгыдан 4 мең гектарга артыграк. Шул исәптән, бөртекле сабанашлык культураларын бер мең гектарга арттыру күздә тотыла. Ә менә сызма техник культуралар мәйданнары элекке дәрәҗәдә кала яисә берникадәр киметелә, мәсәлән, көнбагыш 600 гектарга азрак чәчеләчәк. Уҗым культуралары быел 8664 гектар били, әйткәндәй, аларның мәйданы да берникадәр арттырылды. Уҗым ашлыгы арасында өстенлек бодайга бирелде – ул 6 мең гектардан күбрәк тәшкил итә, арыш 2300 гектарда үстереләчәк, янә тритикале игү күздә тотыла. Гомумән, быел уҗым культураларына игътибар арткан. Чәчүлекләр структурасындагы тоташ район дәрәҗәсендәге хәл мәйданнары буенча төбәктә уртача саналган Айнур Хәбиров хуҗалыгында да күзәтелә. Быелгы чәчү мәйданы биредә 1700 гектар тәшкил итә, шуларның 700 гектарында бөртеклеләр игелә. Сызма техник культуралардан аеруча җитен зур күләмдә үстерелә — 400 гектар. Әйткәндәй, ул чәчү әйләнешендә ныклы урын алмакчы, фермер әйтүенчә, җитен орлыгына хаклар түбәнәйсә дә, ул барыбер табышлы культура булып кала. Хуҗалык басуга районда беренчеләрдән чыккан, агротехник чаралар вакытында башкарыла. Дым каплату, мәсәлән, без үткән атнада хуҗалыкта булганда тәмамлану алдында иде. Моннан тыш, “Т-150” тракторларыннан торган өч агрегат туфрак эшкәртү белән мәшгуль иде. Бай тәҗрибәле механизаторлар Айдар Галимуллин, Фәнис Әхмәдуллин һәм Фәнзил Ергизов көнне төнгә ялгап дигәндәй хезмәт сала. Шуңа да кыр эшләре киң колач белән баруы табигый. Бүздәк төбәгенең элекке данлыклы колхоз рәисе, Русиянең һәм Башкортстанның атказанган авыл хуҗалыгы хезмәткәре Фәнит Гайнуллин җитәкчелегендәге “Урал” хуҗалыгы традицияләрен Әмир авылында лаеклы дәвам итәләр. Әйткәндәй, биредә баш агроном булып эшләп, фидакарь хезмәте белән якты эз калдырган Ирек Хәбировның улы Айнур турыдан-туры дәвамчы да булып тора. Әтисе биләмәгә алган җир нигезендә 22 яшендә крестьян-фермер хуҗалыгы оештыруына да хәзер дистә елга якын. Мәскәү Технологияләр һәм идарә университетында укып чыккан белгеч үсемлекчелеккә махсуслашкан хуҗалыгын тармактагы заманча технологияләрне уңышлы һәм нәтиҗәле кулланырлык дәрәҗәгә чыгара алган. Эш югары дәрәҗәдә алып барылучы, яхшы хезмәт нәтиҗәләренә ия крестьян-фермер хуҗалыгына үткән елда республика Авыл хуҗалыгы министрлыгы гранты бирелүе дә табигый. Бу уңайдан бүленгән акчаны Айнур Хәбиров хуҗалык өчен аеруча мөһим максатка юнәлткән. Ашлык эшкәртүче “ЗАВ-40” агрегаты төзелеше үткән елда башланып, быелгы урак чорына тулысынча әзер булачак. Яңа объектта ашлык киптерү корылмасы да җиһазландырылган. Әйткәндәй, тоташ Бүздәк районы буенча да күп кенә хуҗалыклар үзләренең ашлык эшкәртү корылмаларын булдырды, саклагычлар төзеде. Мондый алшартлар тудырылгач, максат, әлбәттә, күпләп ашлык җитештерүгә юнәлтелә. Хәзерге вакытта барлык хуҗалыклар да иртә бөртеклеләр чәчүгә төште. “Башкирагроинвест”, “Нерал-Бүздәк” хуҗалыкларында эш аеруча оешкан төстә бара. Бу җәһәттән Айнур Хәбиров КФХсы да сынатмый. Район басуларында 200 гә якын трактор эшли, туфрак эшкәртүгә 150 агрегат тупланган, чәчүдә исә 76 агрегат, шул исәптән заманча 25 чәчү комплексы катнаша. Фәнүр Гыйльманов, “Кызыл таң”ның үз хәбәрчесе. Бүздәк районы.