Соңгы елларда авыл хакимияте башлыкларының ярдәмчеләре – авыл старосталары барлыкка килде. Авылның тоткасы алар. Авылдашлары өчен коммуналчылар да, социаль хезмәткәр дә, психолог та. Һәм болар барысы да җәмәгать башлангычында. Шул ук вакытта хакимият белән урындагы халык арасында күпер салучы, элемтәдә торучы, килеп туган мәсьәләләрне көйләүдә һәм хәл итүдә башлап йөрүчеләр алар. Шуңа кечкенә авылга барсам да, старостаны күрергә тырышам. Чынлап та, авыл халкы сайлап куйган бу кешеләрнең җан-фәрман килеп, үзләренең вакыты белән исәпләшмичә, авыл өчен тырышучы бу кешеләргә сокланам мин. Районыбызның берничә авыл чатында торам. Староста ниндидер тәкъдим белән чыгыш ясый икән, ул шунда ук хуплау таба. Менә язга аяк бастык. Экологик өмәләр башланды. Иске Шәрәй авылында, мәсәлән, авыл старостасы Илдар Назыйров, авылдашларын җыеп, шундый тәүге өмәне үткәрде дә инде.Изге Рамазан ае дәвам итә. Кырмыскалы районы мәчетләрендә көн дә диярлек ифтарлар үткәрелә. Мәсәлән, район үзәгендәге иман йорты җитәкчесе Ирек хәзрәт Әбуталипов әйтүенчә, ураза тотучыларны сыйларга теләүчеләр бик күп, шуңа алдан ук исемлек төзеп куйганнар. Шул ук вакытта, көннәр җылытып, җирләр кипкәч, байтак мәчет биләмәләрен тәртипкә китерү буенча өмәләр үткәрелә. Апрель азакларында зиратларда да өмәләр башланачак.Кырмыскалы районының Олыкүл һәм Сарт-Нәүруз авыллары мәчетләренә быел газ үткәрергә исәп тоталар. Имам-хатыйблар бу эшнең күп өлешен үз өстенә алган. Әлбәттә, изге эштән авыл халкы читтә калмый. “Изге Нәүруз” мәчете имам-хатыйбы Руслан хәзрәт Котлыяров билгеләвенчә, документлар әзер диярлек, халык та акча җыюда бик актив катнашкан, читтә яшәүчеләр дә үз өлешен кертә. Газ казанлыгын аларга шәхси эшкуар бүләк итеп биргән. Димәк, кышка кадәр мәчеткә “зәңгәр ягулык” килер, дип ышанасы килә. Шул вакытта биредә дин нигезләрен һәм гарәп телен өйрәнү буенча балалар өчен дәресләр үткәрелә башлаячак. Әлбәттә, әле иман йорты электр энергиясе белән җылытыла. Бу бик кыйммәткә төшә, шул ук вакытта, экономия максатыннан, халык җыелыр алдыннан – җомга һәм өлкәннәр өчен дәресләр үткән көннәрдә бу мәсьәләне имамга алдан ук хәстәрләргә туры килә.Алдагы атнадан республикада “Сәламәтлек поездлары” йөри башлаячак. Төпкел авылларда яшәүчеләр медицина тикшерүе үтә һәм белгечләрдән консультация алу өчен моны көтеп ала. Ә Кырмыскалы районында “Сәламәтлек саклау” гомумдәүләт проектының “Сәламәтлек саклауның беренчел звеносын модернизацияләү” программасы чикләрендә алынган күчмә фельдшер-акушерлык пункты авыллар буйлап сәфәрен бер атна элек башлап җибәрде. Бу вакыт эчендә 96 кеше медицина тикшерүе үтте. Әлеге күчмә фельдшер-акушерлык пункты медицина тикшерүе үткәрү өчен барлык кирәкле корылмалар белән җиһазландырылган. Фельдшер белән берлектә акушерка һәм шәфкать туташы да чыга. Шулай итеп, 100дән азрак халык яшәгән авыллардагы аз мобильле кешеләр йорты алдында диспансерлау үтә. Күчмә ФАП район авылларына графикка ярашлы йөри. Ә бу мәгълүмат авыл хакимияте хезмәткәрләре һәм фельдшерлар тарафыннан авыл чатларына да урнаштырыла бара.Юлда күп йөрергә туры килгәч, шуңа да игътибар итми мөмкин түгел. Авыл биләмәләре хакимиятләре юл буйларын тәртипкә китерүне оештырган. Урамнар гына түгел, зур юл буйларында да капчык-капчык чүп җыелып, аларны авыл хакимияте техникасы махсус чүплеккә илтә.Кыштан соң юллардагы чокыр-чакырлар автомобильдә йөрүчеләргә зур кыенлык тудыра. Шуңа юлларны төзекләндерү эшләре дә актив бара. Юлчылар район үзәгендәге юлларны тәртипкә китереп бетерде диярлек. Шулай ук авыллар арасындагы юлларны тигезлиләр. Кырмыскалы районының Яңа Кыешкы белән Үтәгән авылындагы юл бик киң. Мин үткәндә зур грейдер эшне тәмамлап килә иде. Шуңа бу араны үтү әллә ни авыр булмады. Архангель районында да эшләр тулы көченә бара. Район үзәге белән Казанка авылы арасында асфальт юл яхшы торышта, ә аннан алып Валентиновкага кадәр чокырларны тулысынча ямап чыкканнар.Шулай ук районнарда масус хәрби операциядәге ир-егетләргә ярдәм чаралары оештырыла. Дөресрәге, бу эш туктаганы да юк. Бүгенге көндә хәрбиләргә окопларны каплау өчен маскировка челтәрләре таләп ителә. Шуны истә тотып, авыл халкы челтәрләр үрү белән мәшгуль. Гуманитар конвой белән озатылачак башка кирәк-яраклар да туплана. Мәсәлән, Кырмыскалы районының Прибельский авылы модельле мәдәният йорты ярдәм җыю буенча махсус үзәкне хәтерләтә. Биредә күрше авылларда яшәүче хатын-кызлар, көн саен килеп, маскировка челтәрләре үрә. Шулай ук җылы кием, азык-төлек, башка кирәк-ярак туплана. Олыкүл авылындагы “Наш патриот” волонтерлар штабында да эш тулы көчкә бара.Гомумән, авыл халкы, үз мәшәкатьләреннән тыш, илебез өчен авыр чорда берләшеп, махсус хәрби операциядәге якташларына ярдәм итү, җиңүне якынайту өчен зур тырышлык сала. Кайда гына барма, кем белән генә аралашма: “Тизрәк сугыш тәмамлансын һәм ир-егетләребез исән-имин әйләнеп кайтсыннар иде”, – дигән теләк яңгырый. Әйе, иң мөһиме — илләребез, дөньяларыбыз тыныч булсын. Ә инде көндәлек мәшәкатьләр, проблемалар туып тора, хәл ителеп тора.Эльвира ЯМАЛЕТДИНОВА,“Кызыл таң”ның үз хәбәрчесе.