Հայաստանը 2022 թվականին ընդլայնել է ռազմատեխնիկական համագործակցության շրջանակը և ռազմական տեխնիկայի ձեռքբերման և արդիականացման նպատակով կնքել է ավելի քան 30 համաձայնագիր։ Այս մասին ասվում է կառավարության 2022 թվականի ծրագրի կատարման մասին հաշվետվության մեջ։
«Սպառազինության և ռազմական տեխնիկայի արդիականացման և նոր նմուշների ձեռքբերման գործընթացն իրականացնելու համար ընդլայնվել են ռազմատեխնիկական համագործակցության շրջանակները և կնքվել են ավելի քան 3 տասնյակ համաձայնագրեր», - ասվում է փաստաթղթում:
Կառավարության տվյալներով՝ 2022 թվականին շարունակվել են ԶՈՒ-ում IT - համակարգի ներդրման աշխատանքները։ Ըստ փաստաթղթի՝ շարունակվել է տեսահսկման համակարգերի տեղադրումը՝ «դրանք միացնելով ընդհանուր համակարգին և հասցնելով ՀՀ ԶՈՒ օպերատիվ կառավարման կենտրոն»: Հայ-ադրբեջանական սահմանի պահպանությունը կազմակերպելու համար ձեռք են բերվել անհրաժեշտ համակարգեր, ինժեներական, շինարարական, ուսումնական և այլ միջոցներ:
ՀՀ ԶՈՒ ավիացիան համալրվել է նոր, ժամանակակից բազմաֆունկցիոնալ ուղղաթիռներով, որոնք նախատեսված են դեսանտային, հարվածային, տրանսպորտային և սանիտարական խնդիրների կատարման համար:
Զեկույցում նաև նշվում է, որ 2022 թվականին փոփոխություններ են իրականացվել ԶՈՒ և ԶՈՒ ԳՇ կազմակերպչական կառուցվածքում, մեկնարկել է «Պաշտպան Հայրենյաց» ծրագիրը, ընդլայնվել են վարժական հավաքների անցկացման շրջանակները, բարեփոխվել է դրանց կառուցվածքը, նախապատրաստվել է բանակում կանանց ներգրավվածության ընդլայնման ծրագիրը, ինչպես նաև բացվել է խաղաղապահ բրիգադի «ԶԱՌ» ուսումնական կենտրոնը, որը վերանորոգվել է ԱՄՆ աջակցությամբ։
Բացի այդ, սահմանվել են լրացուցիչ վճարներ պայմանագրային զինծառայողներին, դրանց հաշվարկման համար նախատեսվում է ատեստավորման գործընթաց: 2022 թվականին 917 զինծառայողներ բնակարան են ձեռք բերել արտոնյալ հիփոթեքային վարկավորման ծրագրի շրջանակներում, ինչպես նաև ՊՆ և ԱԱԾ սահմանապահ զորքերի սպաները ստացել են բնակարաններ անհատույց օգտագործման, իսկ հետագայում նաև անհատույց սեփականության իրավունք։
Նշվում է նաև, որ աշխատանքներ են տարվել ծառայության կենցաղային պայմանների բարելավման, զինծառայողների դիրքերի և մշտական տեղակայման վայրերի կահավորման ուղղությամբ:
