Яҙҙы көтәм...

Дегәнәк...Ә мин үҙем был мөғжизәле үләнде ҡасан аңлай, һанлай башланым? Бөтөнләй икенсе ҡараш менән күҙ һалдым? Тәү ҡарашҡа бер матурлығы булмаған, киреһенсә бимазалап, кейемгә йәбешкәк сәскәләре менән һырылып аптырата торған үләнде аңлар өсөн мәктәп, институт белеме түгел, ә ғүмер ағышының бер мәлендә үҙемдең эске хәләтемдең торошоның тирә-яҡ Аллаһы Тәғәлә биргән бөтмәҫ-төкәнмәҫ тәбиғәттән йыраҡлаша барғанын һәм шуның арҡаһында йәшәү көсөнең кәмей барғанын аңлауҙан башланды. Үҙемдең генә түгел, тирә-яғымдағыларҙың да хасталана, сырхаулана башлауы мине хафаландырҙы. Соңғолға төшөп барғанды аңлау күҙҙәрҙе бәйләп, томан шаршауы булып торған кәрәкмәгән белемдәрҙән таҙарынырға, яңы белемгә алыштырырға, яһалма ынтылыштарҙы ысындан айырырға, ихтыяр көсөн туплап иң беренсе үҙемде аңларға йәки иң оҙон юл – үҙемдең эске доньямды, минән нимә көткәнде аңлау юлына баҫыуҙан башланды. Бөтөнеһен тәфсирләп яҙһаң, бер ҙур китап була. Һәм күптәр был юлды үтә тип уйлайым. Ошо мөғжизәле юлда күпме мөғжизәле үләндәрҙең беҙҙең сәләмәтлек өсөн бирелгәнен аңлау бер яҡтан шатландырҙы,икенсе яҡтан әсендерҙе. Әсенеү... Ни өсөн беҙ иң кәрәкле фәнде ныҡ насар беләбеҙ? Иң ҙур асыш минем өсөн Әрем һәм Дегәнәк булды. Әрем тураһында бик күп яҙҙым. Тағы яҙырмын.Ә был яҙмала һүҙ дегәнәк хаҡында. Һәм ул ике кешенең тарихы аша сағылдырылыр. Минән күпкә йәш һәм ҡасандыр бер мәктәптә эшләгән уҡытыусы менән автобус туҡталышында осраштыҡ. Ғәжәйеп тырыш, алсаҡ, тәжрибәле уҡытыусыларҙан белмәгәнен һорашып, үҙ эшен маҡсаттар ҡуйып гөрләтеп эшләгән йәш ҡыҙ ине. Мин ул мәктәптән балаларым уҡырға төшкәс, бүтән мәктәпкә күстем. Уның кейәүгә сығып, ике малай үҫтереп ятҡанда, ире сысҡан ауырыуы менән йәшләй генә вафат булыуын ишеттем. Уҙған йыл осраштыҡ ,ҡыуанып киттек, һөйләшеп торҙоҡ. "Мин, апай, малайҙарҙы әтейһеҙ үҫтереүе ҡыйынлығын үҫмер йәшкә еткәстәре, аңлағас, яҡшы ғына ир-ат тормош юлыма осрағас, Аллаһы Тәғәлә шулай ҡушалыр тип, уға кейәүгә сыҡтым. Һәйбәт үҙе, малайҙарҙы аҡылға ла, эшкә лә өйрәтә, үҙенең балалары кеүек бағыша. Ҡыуанып бөтә алмайым. Уртаҡ бала теләй инек. Башта тикшеренәйем тип тә, нишләптер хәлһеҙлек тә, күремем дә тотҡарлана башлағас, барған инем, аптыраттылар. Дүрт-биш аҙналыҡтай ике миома, аналыҡ (матка) янында, тиҙ арала операция тинеләр. Бәлки аналыҡты ла алырға тура килер тинеләр. Илағанымды белһәгеҙ. Әле иремә әйтмәнем. Бәхет ҡошон тоттом ахыры тип ҡыуанып йәшәп ятҡанда. Башым шаңҡып, аптырап йөрөйем. Гемоглабин түбән. Миома ашай тинеләр. Тимерҙе күтәрә торған дарыуҙар, витаминдар яҙҙылар. Тик улар бит шеште бөтөрмәй. Күрше апай миома ракка ла күсә ул тей. Ҡаланың төп мәсетенә барып, ҡатын-ҡыҙҙар намаҙ уҡый торған яҡҡа инеп, илай-илай белгән доғаларымды уҡып, эй ялбарып сәләмәтлек һорап ултырҙым. Шунда бер оло ғына апай илап ултырғанымды күреп, хәлемде һорашты. Аллаһы Тәғәләнең ҡөҙрәте ҙур, әмәлен бирер, тик яуабын күреп, ишетеп, үтәргә кәрәк тине.Ҡ айҙа икән яуабы, ҡай тарафта? Баҫып торам, үҙем һеҙгә бар асылып һөйләнем, апай һеҙ берәр кәңәш бирә алмаҫһығыҙмы? Минең яратҡан кешемә уртаҡ бала табаһым килә, беләһегеҙме бигерәк тә был бәхеттән мәхрүм булырға торғанымды ишеткәс, миндә был теләк йөҙләтә артты. Хатта күҙҙәрем йоҡонан асылған кеүек. Юҡ, мин был хәләтем менән ризалаша алмайым.Сәбәбе нимәлә,нимә үҙгәртәйем, нимәләр эшләйем? Һеҙ бит апай теге ваҡытта уҡ ас тороу, үләндәр, төнәтмәләр хаҡында һөйләй инегеҙ. Башымды ошо һорауҙар борсой. Тик мин үҙгәрҙем. Ил һаҡларға яуға баҫҡан һалдат кеүекмен." Бер генә ваҡиға ла сәбәпһеҙ булмай. Осрашыуҙар ҙа", - тип яҙҙы ул. Был ҡыҙыҡлы ваҡиғаның дауамы бар. Оҙаҡламай урынлаштырырбыҙ. Фото: volosyinform.ru