Татар хатын-кызларының баш киеме – калфак борын-борыннан сафлык, пакьлек билгесе булып санала. Калфак тегү-чигүдә шактый гына тәҗрибә туплаган “Әллүки” халык фольклор ансамбле әгъзасы Рәсимә Сәмигуллина: “Калфак - баш киеме буларак та, бизәнү әйбере буларак та, татар-хатын-кызларының рухи матурлыгын, күңел байлыгын, тегү-чигү эшенә маһирлыгын, дөньяны танып-белүдә сизгерлеген, зәвыгын чагылдыручы сәнгать җәүһәре ул”, - диде.Милли баш киемен тегү барышындагы нечкәлекләр белән кул эшләре остасы Зимфира Галимова уртаклашты.- Калфак чигү җиңел эш түгел. Ефәк җепләр, вак сәйләннәрдән бизәк ясау өчен сабырлык, игътибарлылык һәм зәвыклылык таләп ителә, - дип ассызыклады ул.Русия һәм Башкортстан Журналистлар берлекләре әгъзасы Әнисә Ягъфәрова Чакмагыш төбәгендә сакланган ядкарьләр хакында бәян итте.- Калфак хатын-кызны күз тиюдән саклый, дигән борынгылар. Аны тегүдә һәр төбәкнең үзенә генә хас ысуллары булган. Чигелешенә, бизәлешенә карап, гаиләнең нәселен, матди хәлен билгели алганнар. Безнең гаилә альбомында картәнием, абзәбием һәм әниемнең калфак киеп төшкән сурәте саклана. Әнием 1939 елгы. Сурәттә аның 3-4 яшьлек чагы гына. Бәхтизиннар нәселенең үткән гасырга караган сурәтләрендә дә сабый кыз балалар калфактан, - дип сөйләде ул.“Раушан” хатын-кызлар клубы, “Дулкын” әдәби иҗат берләшмәсе, “Ак калфак” татар хатын-кызларының Дүртөйле шәһәре бүлекчәсе әгъзалары һәркайсы очрашуга үзе теккән калфакны киеп килгән иде. Алар яшь буынга бәйле борчулы уйлары белән дә уртаклашты, кызларны кул эшләренә җәлеп итү зарурлыгы турында фикер алышты.Күмәк эш җырсыз, шаян сүзсез үтми ул. Осталык дәресе барышында “Ак калфак” оешмасының “Әллүки” халык фольклор ансамбле башкаруында татар халык җырлары өзелеп тормады. Шушы кыска гына вакыт эчендә аеруча оста, җитез ханымнар калфакларын тегеп, киеп тә күрсәтте.Бу чараны оештыручы китаханәче Зөлфә Хисмәтуллина һәм анда катнашучылар халкыбызның милли йөзен саклауга аз гына булса да өлеш кертә алганбыздыр дигән өметтә таралышты.Светлана Васикова,“Ак калфак” татар хатын-кызларының Дүртөйле бүлекчәсе җитәкчесе.Рәсемдә: калфак тегүче гүзәл затлар.Автор фотосы.