ՄԱԿ-ի հատուկ ընթացակարգերի մանդատ ունեցող հինգ փորձագետներ Ադրբեջանին կոչ են արել հրատապ միջոցներ ձեռնարկել Լաչինի միջանցքի ապաշրջափակման համար, հաղորդում է ՄԱԿ-ի Ժնևի գրասենյակում Հայաստանի մշտական ներկայացուցչությունը։ Հայտարարությունը հրապարակվել է ապրիլի 3-ին։
ՄԱԿ-ի մանդատակիրները հիշեցրել են, որ Լաչինի միջանցքը Լեռնային Ղարաբաղը Հայաստանի և արտաքին աշխարհի հետ կապող միակ ճանապարհն է, և այն ունի մարդասիրական նշանակություն։ Շրջափակումը խաթարել է սննդի, դեղորայքի, վառելիքի և առաջին անհրաժեշտության այլ ապրանքների առաքումը 120 հազար մարդու։ Հումանիտար իրավիճակը սրվում է գազամատակարարման ընդհատումներով, որոնք խաթարում են բուժհաստատությունների աշխատանքը։ Չեն աշխատում նաև կրթական հաստատությունները։
ՄԱԿ-ը մտահոգություն է հայտնել, որ Լաչինի միջանցքի շրջափակումը ծանր մարդասիրական հետևանքներ կունենա բնակչության համար։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը: