Һаулыҡ һаҡлауға 104 миллиард һумдан ашыу аҡса йүнәлтелгән

Башҡортостан Хөкүмәте иңендәге өҫтөнлөклө бурыстарҙың береһе – халыҡ һаулығын һаҡлау һәм нығытыу, шулай уҡ ғүмер оҙайлығын арттырыу. Росстат мәғлүмәттәре буйынса, төбәктә көтөлгән ғүмер оҙайлығы уртаса Рәсәй күрһәткесен уҙып, 73,1 йыл тәшкил итте. Республика Хөкүмәте медицина ярҙамынан файҙаланыу мөмкинлеген арттырыу, сифатын яҡшыртыу, милли проекттарҙы тормошҡа ашырыу, һаулыҡ һаҡлау учреждениеларының матди- техник базаһын нығытыу, медицина кадрҙары менән тәьмин итеү буйынса ҙур эш алып бара. –Һаулыҡ һаҡлау үҫешенә 104 миллиард һумдан ашыу аҡса йүнәлтелде. Һуңғы өс йылда 11 эре медицина объекты төҙөлдө. Ошо иҫәптә – дүрт йоғошло ауырыуҙар госпитале. Пандемия осоронда улар медицина ярҙамына ихтыяжды тулыһынса үтәне. 43 меңдән ашыу кеше һауыҡтырылды. Ошо ҡоро статистика артында кеше ғүмерҙәрен ҡотҡарған аныҡ белгестәр тора,–– тине Хөкүмәт Премьер-министры Андрей Назаров. 2022 йылда халыҡ араһында үлем осраҡтары кәмене. 2021 йыл менән сағыштырғанда вафат булғандар һаны 17 550 кешегә йәғни 26,4 процентҡа түбәнәйҙе. Сабыйҙар үлеме күрһәткесе 25,3 процентҡа кәмеп, бер мең кешегә 4,2 тәшкил итте. –Һаулыҡ һаҡлау тармағының төп йүнәлеше – тәүге медицина-санитар ярҙамын камиллаштырыу.Сирҙәрҙе иҫкәртеү сараларының береһе – медицина тикшереүҙәре һәм диспансерлаштырыу үткәреү. Былтыр 1 285 387 кеше табиптар тарафынан ҡабул ителгән. Тәрәнтен диспансерлаштырыуҙы 359 меңдән ашыу пациент үтте, – тип хәбәр итте һаулыҡ һаҡлау министры Айрат Рәхмәтуллин. Былтыр “Һаулыҡ һаҡлау” милли проектын тормошҡа ашырыу иң ҙур бурыстарҙың береһе булды. Уны финанслауҙың дөйөм күләме 7,98 миллиард һум тәшкил итте. Санитар авиация АНСАТ вертолетында 173 осош яһаны. – 17,5 миллиард һумдан ашыуға медицина ҡорамалы һатып алынды. Медицина автопаркы 299 берәмек санитар автотранспорт менән тулыландырылып, өстән бер өлөшөн яңыртты. Өс йыл эсендә республикала 258 фельдшер-акушерлыҡ пункты һәм табиплыҡ амбулаторияһы файҙаланыуға тапшырылды. Хәҙер беҙҙә ике меңдән ашыу ФАП бар, был – илебеҙҙәге иң эре селтәрҙәрҙең береһе, – тине Андрей Назаров. Республикала халыҡҡа медицина ярҙамы күрһәтеүҙең өс кимәлдәге системаһы эшләй, йәшәү урынындағы медицина ярҙамынан алып, юғары технологиялы республика һәм федераль үҙәктәрҙәге медицина ярҙамына тиклем. Фото: Башҡортостан Хөкүмәте сайты.