Արցախի նախկին պետնախարար Ռուբեն Վարդանյանը մեկնաբանել է Արցախի էլիտաների մոտ «ինքնապահպանման բնազդի բացակայությունը»: Վարդանյանը պատասխանել է իր Telegram - յան բաժանորդների կողմից տրված համապատասխան հարցին:
Նա նշել է, որ դա իր համար ամենաբարդ հարցերից մեկն է: Նախկին պետնախարարի խոսքով՝ նման ծանրագույն ճգնաժամի պայմաններում ակնհայտ է թվում, որ հաջողության հասնելու միակ շանսը լինելու է մոռանալ բոլոր մանր կռիվները, վիրավորանքներն ու հակասությունները և միավորվել՝ միասին ուժ լինելու արտաքին թշնամու դեմ:
«Ցավոք, ինչ-որ բան այստեղ չի աշխատում, գուցե այն պատճառով, որ դա արդեն 35 տարի շարունակվում է, և մարդկանց մոտ ինչ-որ սովորություն ու հոգնածություն է կուտակվել: Գուցե այն պատճառով, որ ամեն մեկն ինքն իրեն մտածում է, որ հնարավորություն ունի հարցը լուծելու, թեև դա պատրանք է: Ես խորապես համոզված եմ, որ սա առանցքային մարտահրավեր է, որպեսզի բոլորս՝ ներսում գտնվածներս, գիտակցենք, որ միայն միասին կարող ենք հաղթահարել այս ծանրագույն ճգնաժամը», - ասել է Վարդանյանը:
Վարդանյանը 2022 թվականի սեպտեմբերի 1-ին հայտարարել էր Ռուսաստանի քաղաքացիությունից հրաժարվելու և Արցախ տեղափոխվելու որոշման մասին: 2022 թվականի նոյեմբերի 4-ին դարձել է Արցախի պետնախարար:
ՌԴ նախագահ Վլադիմիր Պուտինը 2022 թվականի դեկտեմբերի 22-ին բավարարել է Վարդանյանի՝ Ռուսաստանի քաղաքացիությունից դուրս գալու դիմումը: Ադրբեջանի նախագահ Իլհամ Ալիևը փետրվարի 18-ին Մյունխենում Հայաստանի և Վրաստանի վարչապետների մասնակցությամբ պանելային քննարկման ժամանակ հայտարարել է, որ Բաքուն պատրաստ է խոսել «Ղարաբաղում ապրող մարդկանց հետ», բայց ոչ Վարդանյանի հետ, և մեղադրել է պետնախարարին, որ նա Արցախ է եկել Մոսկվայի հրահանգով:
Փետրվարի վերջին Վարդանյանը հրաժարական էր տվել։