Թուրքիայի նախագահ Ռեջեփ Թայիփ Էրդողանը հայտարարել է Անկարայում ԱՄՆ դեսպան Ջեֆրի Ֆլեյքի համար փակ դռների մասին այն բանից հետո, երբ նա հանդիպել է նախագահական ընտրություններում միասնական ընդդիմության թեկնածու Քեմալ Քըլըչդարօղլուի հետ։ Այս մասին Էրդողանն ասել է՝ ելույթ ունենալով Ստամբուլի Բաղջիլար նահանգում, փոխանցում է Star-ը։
«Ջո Բայդենն այցելում է պարոն Քեմալին։ Քլխով մտածեք։ Դուք դեսպան եք։ Այստեղ ձեր զրուցակիցը նախագահն է։ Դեսպանի համար մեր դռները փակ են, նա այլևս չի կարողանա ներս մտնել։ Թող իմանա, թե ինչպես պետք է աշխատի դեսպանը: Եթե նա դա չիմանա, չի կարողանա ներս մտնել»,- ասել է Թուրքիայի ղեկավարը։
Ընդդիմադիր «Ժողովրդական դաշինք» կոալիցիայի միակ թեկնածուն՝ Քեմալ Քըլըչդարօղլուն, մայիսի 14-ին կայանալիք ընտրություններում Էրդողանի հիմնական մրցակիցն է։
ԱՄՆ դեսպան Ջեֆրի Ֆլեյքը մարտի 30-ին հանդիպել է Քըլըչդարօղլուի հետ։ Հանդիպումը տեղի է ունեցել քաղաքական գործչի գրասենյակում՝ նրա կուսակցության կենտրոնակայանում, ասվում է ԱՄՆ դեսպանատան հաղորդագրության մեջ։ Ֆլեյքը հանդիպել է Քըլըչդարօղլուի հետ «երկու երկրների միջև փոխադարձ հետաքրքրություն ներկայացնող հարցերի շուրջ թուրքական քաղաքական կուսակցությունների հետ շարունակվող քննարկումների շրջանակում»։