Ошо көндәрҙә Балаҡатай урмансылығы биләмәһендә урман янғынын һүндереү буйынса зона уҡыуын үткәргәндәр. Унда Балаҡатай районы Берҙәм дежур-диспетчер хеҙмәте менән ведомство-ара эш итеү мөмкинлектәре тикшерелгән, шулай уҡ БР Урман хужалығы министрлығы һәм Силәбе өлкәһенең Урмандар буйынса баш идаралығы менән берлектә шартлы рәүештә сик буйындағы янғынды һүндереүҙә көстәр һәм саралар йәлеп итеү буйынса төбәк-ара хеҙмәттәшлек алымдары барланған. Янғын һүндереүҙә 28 кеше һәм 10 берәмек техника ҡатнашҡан. - Урман янғындары формированиелары ҡуйылған бурысты тиҙ арала үтәне, - тип һыҙыҡ өҫтөнә алды зона уҡыуҙарына етәкселек иткән төбәктең урман хужалығы министры урынбаҫары Илгиз Фәтҡуллин. Уҡыуҙарға Балаҡатай, Дыуан, Салауат урман хужалыҡтары вәкилдәре, урман участкаларын ҡуртымға алыусылар, республиканың Урман янғындарын иҫкәртеү һәм һүндереү үҙәгенең урман янғындары станцияларынан, шулай уҡ Ғәҙәттән тыш хәлдәр министрлығының Башҡортостан буйынса баш идаралығынан көстәр һәм саралар йәлеп ителгән. Күнекмәләр барышында ҡатнашыусылар урман янғындары сығанаҡтарын асыҡлау буйынса разведка, шартлы урман янғындарын һүндереү һәм таралыуҙан туҡтатыу, урмандарҙы янғындарҙан һаҡлау мәсьәләләрендә ведомство-ара килешеп эш итеүҙе ойоштороу, шулай уҡ мәғлүмәт менән оператив һәм дөрөҫ алмашыу буйынса диспетчер хеҙмәттәренең эшен ойошторған. Билдәле булыуынса, Рәсәй Президентының «2024 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында»ғы Указын, «Экология» милли проектының «Урмандарҙы һаҡлау» федераль проектын тормошҡа ашырыу маҡсатында Башҡортостандың Урман хужалығы министрлығы «Урмандарҙы һаҡлау» төбәк проектын әҙерләгән. Төбәк проектының маҡсаты - урмандарҙы һаҡлап ҡалыу. Бынан тыш, проект сиктәрендә түбәндәге төп сараларҙы тормошҡа ашырыу ҡаралған: - урмандарҙы тергеҙеү һәм үрсетеү майҙандарын арттырыу; - урман үҫемлектәренән үҫтерелгән үҫентеләр һанын арттырыу; - урмандарҙы тергеҙеү өсөн урман үҫентеләре орлоҡтарының запасын арттырыу; - һәләк булған урман майҙанын кәметеү. Фото: forest.bashkortostan.ru