Башҡортостан Башлығы Радий Хәбиров #Ҡыҙыҡлы кешеләр тормошонан (#ЖЗЛ_Башкортостан) рубрикаһында яңы яҙма менән уртаҡлашты. “Республиканың атҡаҙанған табибы Миләүшә Ризағетдин ҡыҙы Әхмәтшина Үрге Тәтешле үҙәк район дауаханаһында терапевт булып ярты быуатҡа яҡын – 48 йыл! – эшләй. Бөгөн #Ҡыҙыҡлы кешеләр тормошонан_Башҡортостан (#ЖЗЛ_Башкортостан) рубрикаһында уның тураһында һөйләйем. Башҡорт дәүләт медицина университетын тамамлағандан һуң Миләүшә Әхмәтшина йүнәлтмә буйынса тыуған районының Аҡбулат ауылы дауаханаһына эләгә, хәҙер бында табип амбулаторияһы. Дүрт йыл эшләгәндән һуң үҙ ауылына – район үҙәге Үрге Тәтешлегә ҡайта һәм әлегәсә шунда хеҙмәт итә. Бөгөн Миләүшә Ризағетдин ҡыҙының участкаһында – 2700 пациент. Тағы ла 1700 кеше башҡа участканан беркетелгән. Ихлас, иғтибарлы, белемле табипты коллегалары ла, пациенттар ҙа хөрмәт итә. Миләүшә Әхмәтшина район халҡын диспансерлаштырыуҙа, өҫтәлмә медицина тикшереүҙәре үткәреүҙә әүҙем ҡатнаша. 2022 йылда беҙ уны “Башҡортостан Республикаһының һаулыҡ һағы алдындағы ҡаҙаныштары өсөн” миҙалы менән бүләкләнек. Әйткәндәй, Миләүшә Әхмәтшина был һөнәргә атаһы артынан килгән. 1941 йылда Ризағетдин Фәмиев Бөрөләге фельдшер медицина училищеһын тамамлай. Хәрби фельдшер булараҡ һуғышта ҡатнаша, 1946 йылда Тәтешле районына ҡайтып, райондың һаулыҡ һаҡлау тармағын етәкләй. Миләүшә Ризағетдин ҡыҙының ире лә – табип. Ул Үҙәк район дауаханаһында 25 йыл невропатолог булып эшләгән. Балалары икенсе өлкәләрҙе һайлаған, уның ҡарауы бөгөн ейәндәре Ильяс И.М. Сеченов исемендәге Беренсе Мәскәү дәүләт медицина университетының дүртенсе курсында уҡый һәм травматолог булырға хыяллана. Миләүшә Ризағетдин ҡыҙына һәм барлыҡ медицина хеҙмәткәрҙәренә изгелекле йөрәктәре, яуаплы һәм намыҫлы хеҙмәттәре өсөн оло рәхмәт. Барығыҙға ла һаулыҡ һәм яҡшы ялдар!” – тип яҙҙы Радий Хәбиров. Фото һәм сығанаҡ: vk.com/radiyhabirov