Там таӆан мет оӆаң пуш АНО «Ямал-Медиа» хоща рупитты хоятат номас версат вуӆэң ёх емаң хатаӆан нюки хот ӆонщты. Щаӆта хораң конкурс округ ӆоватан этӆыты хуӆам газет эӆты верты: «Красный Север», «Няръяна Ңэрм» па «Ӆух Авт».
Ӆонщиӆыйм нюки хота мет аршак хоят ӆоңемийс, газетаята ханшӆтантыйс, хораң конкурса пиӆтащийс, хошмаӆтыйс, каврам шай йинщемийс.
Мет ар хоят хораң конкурса пиӆтащийс. Катсоткем хоят хораӆ вуса, хоӆ хуӆам газета «ВКонтакте» поныӆыса, кашң газета эӆты вет хоят мойӆаптаса. «Ӆух Авт» хоща вет хоят кутан Галина Михайловна Граблевская нох питас, каматса ясаң ястас: «Вуӆэң ёх емаң хатӆа ма Натаң вош эӆты ёхатсам. Там пуш щикем ям, хорасаң па умащ емаң хатӆ верыӆыса. Тыеӆ-тохеӆ шушиӆыман: хоятан арамтам нюки хот кащаӆасам. Щита нэш хораң конкурс верӆа, ох сохаптаты ант мосаӆ. Кашң газетайн наң хорэн оӆаң лопса питты верытаӆ. Щикем умащ! Век ант нумассам, мойӆаптаӆайм! Таӆ такӆы нэш ант ёхтыӆымем. Ун пумащипа нынана верты рупатайн ураңан, ханты ясңан еӆӆы туӆты, аратаӆ мир ияха актаӆыӆты».
Хой там еӆпийн кум ант шитас газетая ханшӆтантыты, верытас мохты шай йинщам юпийн ох сохаптаты. Хуӆамсоткем хоят щи веран пиӆтащийс, ханшӆтантыйс. Таӆ соханты унты «Ӆух Авт» газет ӆуңтыӆыяты, муңев па айкеӆ верыӆыяты.
Аллина Тоярова ханшам потар