Туган телле дә, “Әллүки”ле дә алар!

“Әллүки”челәр Алексеевка урта мәктәбе укучылары белән еш очрашып тора. Шундый очрашуларның берсе башлангыч сыйныф укучылары белән “Күңелле балачак” дигән осталык дәресенә багышланды. Кызлар һәм малайлар журналист апалары, татар теле һәм әдәбияты укытучылары Резеда Хәмитова, Резеда Яхутова җитәкчелегендә журналда үрнәге бирелгән китапчыкны үз куллары белән ясады.Башкортстан шагыйрьләренең кызыклы шигырьләре тупланган китапчык бик матур килеп чыкты. Шунысы сөенечле: бу китапчыктан балалар туган телдә шигырьләр укып, ятлап укытучыларын, әти-әниләрен сөендерәчәк. Әлеге белем учагында туган телләр укытуга зур игътибар бирелә. Мөгаен, шуңа да, мәктәптә татар телен өйрәнүче укучылар саны да елдан-ел арта. Укытучылары Резеда Ризалүн кызы һәм Резеда Морат кызы җитәкчелегендә алар “Туган тел атналыгы”, “Шәҗәрә бәйрәме”, концертлар, бәйгеләр, флешмоблар оештырып кына тора. – Безнең мәктәптә барлыгы 988 бала белем ала, шуларның 416сы татар милләтеннән. 136 бала татар телен туган тел буларак өйрәнә. Укучыларыбыз бик тырыш, сәләтле, мәктәптәге чараларда актив катнаша. “Тукай моңнары” конкурсын балалар көтеп ала. “Туган тел көне”ндә мәктәп гөрләп тора, тәнәфестә укучылар милли көйләргә бииләр, өлкәнрәк сыйныфларда милли дискотекалар үтә. Район, шәһәр күләмендәге бәйгеләрдә дә яхшы нәтиҗәләр күрсәтәбез, – ди Резеда Ризалүн кызы. Төрле милләт балалары укыган мәктәптә туган телләрне өйрәнүгә зур игътибар бүленеп, тиешле шартлар булдырылуы аеруча сөенечле. Балалар үз туган телләрендә шигырьләр, җырлар өйрәнә, иҗат итә, гореф-гадәтләребезне белеп үсә. Башлангыч сыйныфларда татар телен 60 бала өйрәнә. Укытучылар әйтүенчә, татар теле, әдәби уку дәресләрендә “Әллүки” журналы аларга ярдәмгә килә. Укучылар журналдагы сынамышларны, табышмакларны бик кызыксынып чишә, әкиятләрне укый, шигырьләрне ятлый. Андагы биремнәр укучыларның уку һәм сөйләм күнекмәләрен үстерүгә юнәлтелгән. Алексеевка мәктәбе укучылары “Әллүки”дәге бәйгеләрдә дә еш катнаша. Абыйлы-энеле Шаһиевлар – иң активлары. Әйтик, 7нче сыйныфта укучы Илназ җәй көннәрендә “Күңелле ял итәбез!” конкурсында 1нче урын яулады. Аның 4нче сыйныфта укучы энесе Ильяс та сынатмый, “Әллүки” бәйгеләрендә урыннар яулап тора. Туган телебездә чатнатып сөйләшүче, журналга һәрвакыт беренчеләрдән булып язылучы, укуда сынатмаучы, төрле чараларда актив катнашучы бертуганнарга киләчәктә дә уңышлар юлдаш булсын. Туган телгә изге хистә булган мөгаллимәләргә, аларның тырыш укучыларына уңышлар, матур нәтиҗәләр телибез!Динар Кәлимуллин фотосы.