Быйыл Рәсәйҙә Уҡытыусы һәм остаз йылы бара. Ошоға бәйле төрлө саралар үткәрелә. Бөгөн дә Өфөлә “Башҡортостандың килер быуыны уҡытыусыһы” тигән республика фәнни-методик форумы асылды. Уның төп ойоштороусыһы – М. Аҡмулла исемендәге Башҡорт дәүләт педагогия университеты. Сарала юғары уҡыу йорттары, мәктәп уҡытыусылары, мәғарифҡа идара итеү системаһы вәкилдәре ҡатнаша, ҡунаҡтар – Донецк һәм Луганск халыҡ республикаларынан уҡытыусылар бар. Форумдың темаһы – психологик-педагогик кластар моделен тормошҡа ашырыуҙың көнүҙәк мәсьәләләре. Бындай кластарға ҡағылған өс йүнәлештәге майҙансыҡ эшләй: проектлау эшмәкәрлеге, белем биреүҙең йөкмәткеһе һәм остазлыҡ моделдәре. Форум эшендә федераль спикерҙар ҙа ҡатнаша. Волгоград дәүләт социаль-педагогик университеты вәкиле Светлана Спиридонова, Урал дәүләт педагогия университетынан Наталья Белоусова. Апрель башында баш ҡалабыҙҙа “Взлетай!” мәктәп белеме форумы үткәрелә, һәм уҡытыусыларҙың әлеге йыйыны тап уның алдынан үтеүе осраҡлы түгел. Педагогтарҙың мәғарифтағы көнүҙәк, һис кисекмәҫтән хәл ителә торған мәсьәләләрҙе уртаға һалып һөйләшә, фекер алыша һәм ошонан сығып алдағы форумға тәҡдимдәр әҙерләргә форсаты бар. Сара шулай уҡ Аҡмулла университеты менән уның партнер мәктәптәре, мәғарифҡа идара итеү системаһында эшләгән вәкилдәрҙең психологик-педагогик кластар эшмәкәрлеген йәнләндереү буйынса бурысын берләштереү мөмкинлеген дә бирергә тейеш. Форсаттан файҙаланып, ситтән килгән ҡунаҡ менән әңгәмәләшеп алдыҡ. Екатерина Агеева – Донецк Халыҡ Республикаһының Шахтерск ҡалаһы мәктәбе вәкиле: – Өфөгә килеү менән бик әүҙем эш мөхитенә сумдыҡ. Мәктәбебеҙ Аҡмулла университеты менән килешеү төҙөнө, вуз беҙгә шефлыҡ итә. Психологик-педагогик йүнәлешле кластар менән эш алып барыу алымдарына өйрәнәбеҙ – Аҡмулла университетында был йәһәттән ҙур тәжрибә тупланған. Ғәйәт файҙалы белем алабыҙ, был алдағы эшебеҙҙә ныҡ ярҙам итер, тип ышанабыҙ. Беҙҙә әле ундай кластар эше башланып ҡына тора, ә Башҡортостандағы коллегаларыбыҙ һәр яҡлап ярҙам итергә, белемдәре менән уртаҡлашырға әҙер, бының өсөн ҙур рәхмәт! Уҡытҡан балаларыбыҙ киләсәктә педагог булып китмәһә лә, алған белемдәре һөнәрҙе дөрөҫ һайларға ярҙам итер, тип ышанабыҙ. Форум эше төрлө майҙансыҡтарҙа дауам итеп, уҡытыусылар эш тәжрибәһе менән уртаҡлаша, төрлө мәсьәләләр тураһында фекер алышасаҡ. Айрат Нурмөхәмәтов фотолары.