ԵՄ առաքելության ղեկավար Մարկուս Ռիտերը Deutsche Welle-ի հետ զրույցում հայտարարել է, որ «հայերից շատերը կարծում են, որ Ադրբեջանը հարձակողական գործողություններ կսկսի գարնանը»։
«Եթե դա տեղի չունենա, մեր առաքելությունն արդեն հաջողված կարելի է համարել»,- ասել է Ռիտերը:
Նրա խոսքով՝ շատ հայեր ողջունում են ԵՄ ներկայությունը, սակայն նա հիշեցրել է, որ դիտորդներին թույլ չեն տալիս մուտք գործել Ադրբեջանի տարածք։ Այդպիսով՝ առաքելությունը չի կարողանում հայտնաբերել, օրինակ, զորքերի տեղաշարժը հարձակման նախապատրաստման ժամանակ:
«Մենք չենք կարող միջամտել, մեր տրամադրության տակ կան միայն հեռադիտակներ և տեսախցիկներ»,- ընդգծել է ԵՄ առաքելության ղեկավարը։
Ավելի ուշ Ադրբեջանի ԱԳՆ-ն արձագանքել է ԵՄ առաքելության ղեկավարի այս հայտարարությանը։
«Մենք խստորեն դատապարտում ենք այն փաստը, որ ԵՄ քաղաքացիական առաքելության ղեկավարը, հիմնվելով հայկական կողմի կեղծ և զրպարտչական հայտարարությունների վրա, կարծիք է հայտնել, որ Ադրբեջանն իբր պատրաստվում է հարձակման, և ԵՄ առաքելության հիմնական խնդիրը ներկայացրել է՝ պաշտպանել Հայաստանը Ադրբեջանից»,- ասված է Ադրբեջանի ԱԳՆ հայտարարության մեջ։
Բաքուն կոչ է արել ԵՄ առաքելությանը «չենթարկվել կեղծ և զրպարտչական հայտարարություններին» և գործել իր մանդատի համաձայն։
Հունվարի 23-ին ԵՄ խորհուրդը հրապարակել էր Եվրոպական միության որոշումը՝ երկու տարի ժամկետով Հայաստանի սահմանամերձ շրջաններ քաղաքացիական առաքելություն ուղարկելու մասին։ Հայաստանում ԵՄ առաքելությունը (EUMA Armenia) ընդգրկում է մինչև 100 անձնակազմ, այդ թվում՝ մոտ 50 անզեն դիտորդներ։