“Һаулыҡ һаҡлау” милли проектының “Онкология сирҙәре менән көрәш” төбәк проектына ярашлы, Салауат дауаханаһына операция бүлмәһен яҡтыртыу өсөн күләгәһеҙ медицина яҡтыртыу системаһы алынды. Бындай хирургия яҡтыртҡысы – операция ваҡытында ҡулланылған иң популяр яҡтыртыу ҡорамалы. Ҡеүәтле лампалар иҫәбенә эшләүсе прибор тигеҙ яҡтырта, күләгә бирмәй. Бындай типтағы яҡтыртыу ҡорамалы файҙаланыу срогы оҙайлы булған диодтар менән йыһазландырылған. Махсус яҡтылыҡ эш зонаһын йылытмай. Күп рычаглы системаны кәрәкле йүнәлештә операция өҫтәленә ҡарата урынлаштырып була. "Яңы ҡорамал медицина ярҙамын юғары кимәлдә күрһәтеүҙе тәьмин итә, сөнки ул яҡшы оптик һәм яҡтыртыу үҙенсәлектәренә эйә", – ти дауахананың баш табибы Илшат Яппаров. Онкология сирҙәре менән көрәш – “Һаулыҡ һаҡлау” милли проектының төп йүнәлештәренең береһе. Милли проект онкология диспансерҙарын киң күләмдә йыһазландырыуҙы һәм амбулатор онкология ярҙамы үҙәктәрен асыуҙы күҙ уңында тота. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект "Здравоохранение") төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Фото: Һаулыҡ һаҡлау министрлығы.