Солтүстік Қазақстан облысының Айыртау ауданында орналасқан түзету мекемесінде жазасын өтеп жүріп адамды балтамен ұрып өлтірген қылмыскерге қатысты сот үкімі шықты, деп хабарлайды Qazaqstan Media тілшісі.
Естеріңізге сала кетейік, 2022-ші жылдың 9-шы қарашасында таңғы 05:57-де Айыртау ауданы Новоукраинка елді мекеніндегі қылмыстық-атқару жүйесінің №51 мекемесінде 1976-шы және 1994-ші жылы туған сотталғандар арасында жанжал шыққан. Оның арты төбелеске ұласып, 28 жасар азамат қарсыласын балтамен ұрғылаған. Қан-жоса болған 46 жастағы жазасын өтеуші Айыртау ауданының ауруханасына жеткізіледі. Алайда алған жарақатынан есін жимастан қайтыс болды.
Бүгін СҚО-ның қылмыстық істер бойынша ауданаралық соты ауыр қылмыс жасаған азаматқа қатысты үкім шығарды.
«Сот үкімімен 1994-ші жылы туған Пешковқа ҚР Қылмыстық Кодексінің 99-шы бабы 1-ші тармағына сәйкес12 жылға бас бостандығынан айыру жазасы тағайындалсын. Үкімдердің жиынтығы бойынша бұрынғы жазаның өтелмеген бөлігі ішінара қосылып, 14 жыл бас бостандығынан айыру түріндегі түпкілікті жаза қарастырылған», — деп мәлімдеді СҚО Қылмыстық істер жөніндегі мамандандырылған ауданаралық сотының судьясы Әбдікаххар Еркебаев.
Айта кеткен жөн, 2020-шы жылы Пешков дәл осыған ұқсас қылмыс жасағаны үшін 6 жылға бас бостандығынан айырылған болатын.