Պետական դավաճանության կասկածանքով Արցախի բնակիչներ են կալանավորվել։ Այս մասին հայտնում են Արցախի քննչական կոմիտեից։
Ըստ հաղորդագրության՝ պարզվել է, որ Ստեփանակերտ քաղաքի երկու բնակիչ սոցիալական ցանցերի միջոցով կապ են հաստատել Ադրբեջանի հատուկ ծառայութունների հետ, շահեկան առաջարկության և պարբերաբար վարձատրության դիմաց նրանց փոխանցել գաղտնի և հույժ գաղտնի տեղեկություններ, ինչպես նաև Արցախի բնակիչների անվտանգության, տնտեսության ընդհանուր վիճակի, շրջափակման պայմաններում սոցիալական ծրագրերի, կառավարության կազմում տեղի ունեցող փոփոխությունների, նախագահի հրամանագրերի, Արցախի բնակչությանը վերաբերող այլ տեղեկություններ՝ կատարելով պետական դավաճանություն:
Նշվում է, որ նշված երկու անձինք հետաքննության մարմնի կողմից ձերբակալվել են, իսկ քննիչի կողմից նրանց մեղադրանք է առաջադրվել։
Արցախի քննչական կոմիտեն հորդորում և զգուշացնում է, հատկապես համացանցի տիրույթում ցուցաբերել ծայրահեղ զգոնություն և զգուշություն, չտրվել գայթակղիչ առաջարկություններին և նույնիսկ առաջին հայացքից աննշան տեղեկություններ չհայտնել այլ օգտատերերի։