«Яңы кешеләр» партияһы фракцияһы депутаттары Дәүләт Думаһына май айындағы байрамдарҙы оҙайтыу хаҡында закон проекты индерҙе. Был проект ғинуар айындағы ял көндәре иҫәбенә 1 майҙан алып 9-ына тиклем ял итеүҙе күҙаллай. Ә бына ғинуарҙа 1,2,3-өн һәм 7-дәге Раштыуа байрамын ғына ҡалдырыу яҡлы закон проектының авторҙары. Май айындағы оҙайлы ялдар баҡсала күберәк эштәр эшләргә мөмкинлек бирәсәк, эске туризмды, бәләкәй бизнесты үҫтереүгә ыңғай йоғонто яһаясаҡ, тип белдерә «Яңы кешеләр» партияһы депутаттары. Авторҙарҙың береһе - фракцияның вице-спикеры Владислав Даванков, быйыл 29 апрелдән 1 майға тиклем баҡсаларында ял иткән халыҡ дүрт көн эшләгәндән һуң йәнә унда китергә мәжбүр буласаҡ, шулай булғас, хеҙмәт урындарында һөҙөмтәлелек кәмей, етәксенән алып ябай хеҙмәткәргә тиклем кемдә эш ҡайғыһы булһын был көндәрҙә, тигән фекерҙә. Ә бына «Берҙәм Рәсәй» партияһы фракцияһы етәксеһе урынбаҫары Андрей Исаев «Илдә байрамдар иҫәбе профсоюздар ойошмаһы, эш биреүселәр һәм Хөкүмәт менән килешеп юлға һалынған. Был осраҡта ла өс яҡлы һөйләшеүҙәр мөһим», - тип белдерә. Әгәр был закон проекты бер тауыштан ҡабул ителһә, быйылдан май айында оҙайлы ялдар көтөлә. Ә һеҙ нисек уйлайһығыҙ, нисек яҡшы? Фекерҙәрегеҙҙе яҙығыҙ әле, зинһар.