Яңа заман өчен көчле идеяләр кирәк

Чараны Стратегик башлангычлар агентлыгы (АСИ) һәм «Росконгресс» фонды оештыра. Форумның төп максаты - Русия суверенитетын ныгытуга һәм милли максатларга ирешүгә зур өлеш кертәчәк башлангычларны һәм проектларны гамәлгә ашыруны ачыклау һәм аларга ярдәм итү. Идеяләр җыю 6 юнәлеш буенча башкарыла: милли социаль башлангыч, милли технологик башлангыч, милли кадрлар башлангычы, милли экологик башлангыч, эшкуарлык, санлы сервислар. Гаризалар кабул итү 2023 елның 26 апреленә кадәр дәвам итәчәк. Төбәк этабында Башкортстан Республикасы 1000 идея җыюны җитди бурыч итеп куйды. Бу хакта «Россия» медиаүзәгендә узган матбугат конференциясендә Хөкүмәт Премьер-министрының беренче урынбасары, икътисади үсеш һәм инвестицион сәясәт министры Рөстәм Моратов сөйләде. - Идеяләр эзләү, үз-үзеңне танытачак, алар өчен башлангыч үсеш нокталары булачак проектлар эзләү бүген федераль дәрәҗәдә хуплана. Бүген Башкортстанда күп кенә үсеш юнәлешләре гамәлгә ашырыла. Федераль форум идеясеннән файдаланып, республика иҗади кешеләрне, прогрессив инициативаларны ачыклау механизмын булдыра һәм аларга ярдәм итү системасын формалаштыра. 26 апрельгә кадәр без федераль дәрәҗәдәге тәкъдимнәребезне барларга тиеш. Илгә сезнең идеялар кирәк! - диде республиканың беренче вице-премьеры. Идеяләр инициаторларына ярдәм итү өчен Башкортстанда профильле хакимият органнары, муниципалитетлар, эшлекле һәм һөнәри берләшмәләр, фәнни һәм мәгариф оешмалары, үсеш институтларының уртак эше оештырылган. Форум юнәлешләре буенча оештырылган командалар авторларга, аларның күләменә карамастан, идеяләрне рәсмиләштерүдә һәм камилләштерүдә алдан эксперт бәяләмәсен һәм методик ярдәмне тәэмин итәчәк. "Яңа заман өчен көчле идеяләр" форумына идеяләрне сайлап алуның төп критерийлары булып проблеманың әһәмиятлелеге һәм актуальлеге, инновациялелек, тәкъдим ителгән чишелешнең нәтиҗәлелеге, лидер һәм команданың нәтиҗәгә ирешү өчен кирәкле компетенцияләре булуы тора. Идеяне 2023 елның 26 апреленә кадәр Форумның федераль платформасында тәкъдим итәргә мөмкин https://идея.росконгресс.рф Шул ук вакытта Башкортстан авторларга форумда катнашу буенча үз идеяләрен һәм сорауларын республика оештыру комитетына белдерергә тәкъдим итә: Silnye_idei@bashkortostan.ru Форум турында тулырак мәгълүмат БР инвестиция порталында урнаштырылган (INVESTRB.RU). Башкортстан Республикасы муниципаль яки төбәк дәрәҗәсендә тормыш һәм эшчәнлекнең теге яки бу өлкәсен үстерүне тәэмин итә алган идеяләрне хуплаячак. «Яңа заман өчен көчле идеяләр» федераль форумының йомгаклау этабында ил җәмгыяте һәм икътисады өчен максималь потенциаллы идеяләр авторлар тарафыннан шәхсән Русия Федерациясе Президенты Владимир Путинга тәкъдим ителәчәк.