Форум яңалыкларга бай булачак!

Уфада “Мәгарифтә күтәрелеш! " республика мәктәп белем бирү форумы эшен башлады. Чара 6-7 апрельдә “Торатау” Конгресс-холлында узачак һәм ул бу юлы Педагог һәм остаз елына багышлана. Мәгариф һәм фән министры Айбулат Хаҗин хәбәр иткәнчә, форумда укучыларны, ата-аналарны һәм педагогларны күп сюрпризлар көтә. "Педагог һәм остаз елында безнең төп бурычыбыз — педагог һөнәрен популярлаштыру. Әлбәттә, беренче чиратта, педагог һөнәренең үсеше, модернизациясе һәм перспективалары, кадрлар дефициты мәсьәләләре буенча фикер алышачакбыз. Мәктәпләрнең матди базасын ныгытуга, укытучыларга, шул исәптән мәктәпкәчә белем бирү педагогларына ярдәм итүгә юнәлдерелгән проектлар каралачак. Шулай ук уңышлы методик тәҗрибәләр белән уртаклашырга тырышачакбыз", — диде Айбулат Хаҗин. Форумның беренче көне кысаларында сигез дискуссия мәйданчыгы планлаштырылган, чарада катнашучылар сәләтле балаларга һәм яшьләргә ярдәм итү, педагогларны аттестацияләү системасына үзгәрешләр кертү, яңа белем бирү программалары һәм мәктәпкәчә белем бирү өлкәсендә идарә итү мәсьәләләре буенча фикер алышачак. Форумның икенче көнендә, 7 апрельдә, педагогик белем бирү, максатлы укыту, инклюзив белем бирү, тәрбия системасына багышланган тагын биш дискуссия мәйданчыгы эше оештырылачак. Мәктәп форумының нәтиҗәсе пленар утырыш булачак. Анда Башкортстан Башлыгы Радий Хәбиров катнашыр дип көтелә. Шулай ук форум эшендә федераль структуралар вәкилләре, беренче чиратта Русия Мәгариф министрлыгы, Русия мәгариф академиясе һәм илнең башка әйдәп баручы югары уку йортлары лекорлары катнашачак. Исегезгә төшерәбез, “Мәгерифтә күтәрелеш!” беренче мәктәп форумы 2019 елда Радий Хәбиров башлангычы белән узды. Төбәк җитәкчесе форум мәгариф өлкәсендәге актуаль мәсьәләләр буенча фикер алышу өчен мөһим мәйданчык булып торуы турында берничә тапкыр ассызыклады. "Әгәр дә без алга омтылмасак, без урында таптаначакбыз. Безнең республика конкурентлык көрәшендә Евразия фәнни-мәгариф үзәге булдыру, югары уку йортлары арасында студентлар кампусы төзү хокукына ия булды. Бу, һичшиксез, мәктәпләрне үзенә җәлеп итәр дип ышанам. Әмма моның өчен безгә заманча булырга, даими камилләшергә кирәк”, - дип билгеләде форумнарның берсендә республика җитәкчесе Радий Хәбиров. Биш ел эчендә “Мәгарифтә күтәрелеш! " форумы кирәклеген исбатлады һәм масштаблы чара статусын алды. Элек үткәрелгән форумнарда биш көнлек укыту режимына күчү, яшь педагогларга грантлар бирү, полилингваль белем бирү системасын үстерү, бердәм тәрбия киңлеге булдыру (“тематик шимбәләр”), стоматология кабинетларын ачу һәм башка проектлар кебек мөһим карарлар кабул ителде. Фото: bashinform.ru