Там потар Светлана Тайшина хансас, ӆув Охсарка ашкоӆайна нийӆмет классна онттыяӆ. Светлана ӆув ханты ясңаӆ ямас хасӆаӆӆы. Тамащ хорам потар хансты ораңна, нэңху ӆув муваӆ ямас хаста масӆаӆӆы па самаӆна омащщи тайта.
Мала хорпи топ муң мувувна емаң хатӆат ант оӆлиӆат. Касаң емаң хатӆат нэңхэтна ӆаяӆӆайт па сэңк омщаӆаӆайт. Вуӆ ащиӆув, вуӆ амыӆув, щаӆта па ащиӆув па амыӆув емаң хатӆ пела ӆэщатыӆат. Хой масаң хорам мальчаң па эвтам сах, эвтам вай йинӆ, хой тун каратӆ, хой па ның охал хорамми ӆэщатӆ.
Ун кер тыӆащ алаңмет хатӆна муң Кев сыӆна олты тахайна, тащ емаң хатӆ верӆа. Щи емаң хатӆна аса каӆаң савиты нэңхэт ияха ёхтыӆыӆат, собрание верӆат. Хоты там пус таӆ манас, хоты каӆаңӆаӆ сависат, холна хоты товы порайна каӆаң тащ ӆуң тахайна вастата масӆ. Потарӆаӆ сэңк арат! Энамты нэңхэт эви вантыӆат, масаң самӆаӆ яха рахлат, масаң щи порайна йиӆап хаттэӆ этаӆ.
Щитна щи каӆаң нэңхэт нявремӆаӆ ищи онттаӆӆаӆ, хоты каӆаңна яңхта па каӆаң савита масӆ.
Онттыта етсатаӆ юпина ӆув вутщияӆ каӆаң савита. Хор: Вера Лонгортова.
Муң Овас мувевна вуӆ интернат ол. Щи интернат Кев сыӆ районна ол. Щита каӆаң нэңхэт па хуӆ веӆты нявремат оллат. Касаң няврем ӆув ротӆна ол.
Павел Вэненго нийӆмет классна онттыяӆ. Паша ащеӆ па амэӆ пиӆна каӆаңна оллат, Хадыта хощаңна. Онттыта етсатаӆ юпина ӆув вутщияӆ каӆаң савита. Каӆаң вастата щит щёкат па масты вер.
Паша ащеӆ лавилияс, хунты Паша ям оценкаятна ветмет классаӆ етсаӆ, луңан каӆаң савита вуӆӆы. Паша ямас онттыяс и ащеӆна ӆув пилеӆна вусӆы.
Щита каӆаңат хоща катсат эваӆт арсак каӆаң. Касаң каӆаң ащеӆна хасӆайт. Па Паша ӆув отча ант веритӆаӆӆы щимащ вуӆ тащ савита. Щитна нятӆ холна кат неңху. Холна ям няттыт таяӆ, щит кат амп Купи па Ӆаңки. Ӆын вантӆаңан каӆаңат сар тахайна ант ат манӆат.
Товы каӆаң савитыт эӆты, мет щёкат пора. Веӆащ ай суюват сэмна питсат и ӆув юпиӆаӆна ямас вантта масӆ.
Ащеӆна Паша онттаӆа, хоты каӆаң савита масӆ. Каӆаңат пела вантта масӆ, вуӆ рэп эваӆт каӆаңат ямас ныӆайт. А бинокль эваӆт сыяӆата рахал, ант пеӆы тащ пела каӆаң парты вай йиӆ па молаки па вай.
Ӆуң орхат каӆаң нэңхэт паӆ рэп эӆты аматӆат, щита аӆпа ват ров и хув муват ямас ниӆайт и кев ныӆа.
Ӆуң эваӆт каӆаңат ар ӆысат. Каӆаңат хоща Паша паскан пиӆна яңхал. Ащеӆна каӆаң савита щикус итна эсӆыӆыӆа.
Най касаң хатӆ аӆтайи иӆ манӆ, аттыйи йиңк сатаятна ёңкки ювиӆыяӆ.
Ям амаста, хасам ор хатна. Хат кутапна тут ӆыӆ. Сытам, топ щатӆ, хоты каӆаңат ӆаӆӆат. Имосайна аттыйи ланщ питас. Ашкоӆайна манта масӆ. Паша ащеӆна, охална ванна олты васна туса, щиӆта Паша вертолётна интернатна порӆас.
Ольга Пандо ӆэщатсаӆӆы