Таӆкахай школа-интернатхана тохоӆкота’’ ӈашки’’ хома шеӆ мэӈа’’. Пытоӈ хайму’’ нятапи’’. Дяӆитахана урокатуӈ пут технологимтуӈ минӆена ӆушинехентуӈ тошту’’. Тяньняна няхаӆ час дямпан хайтуӆашту’’, ӈоӈктоӆьшту’’, паӈкоӆьшту’’. Тохоӆкота’’ ӈашкиуде’’ хайноӆьш каймы’’ нятапи’’. Хаймыхина мэна’’ нетуӈ панэт хайтуӆаӈа’’. Хайму’’ нятапёшь манӆе мыӆичуӈ няӈат чепьмай’’.
Неӆьчеэй няна технологии уроктуӈ минӆена ӆушинетоӈ Раиля Миндиярова каӆьта вешаханата лапкахат дяӆнас тэмтамай, тай’ня чикехетоӈ школахантуӈ тохоӆкота’’ ӈашки’’ няш балаклаву’’ — шат’ тамтампёшь мэта’’ шеӆтамай’’. Чикиӈ пут нум чешха’махат дюпа паныдю’’: пюмя’’, мякна мэта дяӆнас’’ — таӆьша’’ ӈамыку’’ ӈашкиуде’’ хайтуӆаш чепьмай’’. Ӈопшеӆ дюӆкат ва’та балаклав шеӆтамай’’, няхаӆ дюкат ӈука’’ пюмям хятмай’’, шитчет’ дю’’ пюмяӈ таӈкам.
Чикитоӈ хаймыхи’’ ӈайтамтамытуӈ, таньняна мэна’’ манӆе мячисытуӈ няаммайтуӈ. Ӈопшеӆы няхаӆ мэмаӈ таӆьша’’ мячисы’’ хаймыхина мэнаха’’ ӈайтаптамай’’, четы шеӆтапёчитоӈ четты паныдётуӈ. Четаӈ хаймыхина лекӆу’’ мякна мэна’’, дятаӆёй хадям’’ панэт хятпи’’. Пунӆыдю’’ дёӆьшат ӈайта шорты пюмя’’, ӈамсамана мэта’’ пюмяӈ таӈка’’, мякна мэта’’ ниньшику дяӆнасыхит хятмы’’ лонгслив’ паны’’.
Чикитоӈ ӈупчики таамнатуӈ няхаӆ дют -чет’дют ӈок ӈайты’’. Чики хятмайтуӈ ӈамыдётоӈ неньшаӆмана каныӆчи’’ шеӆаштомаӈ мэты, шиш’детун, чупей липучкахат мэта’’. Шичитуӈ хайтуӆаш тохоӆампюта ӆушинетоӈ хаймыхина мэнаха’’ ӈамы таӆамам неӆьшут намташтута. Четаӈ манӆе таӈичуӈ няӈ ӈанатадят.
Таӈичохона мэта’’ паны’’, шомя’’, балаклав — таӆьша ӈамыку’’ ниньшику дяӆнасыхит хятпёнӆы’’. Хайму’’ панэт хайтуӆаш мэтататуӈ дяӆнасатоӈ Пюӆ дяханана ӈайта штабхана #МыВместе мэна’’ тэмтамай’’. Ӈашкиуде’’ маньшту’’, пытоӈ каӆьтуӈ вимнянтуӈ нятакоман хаш’, хайму’’ панэт, хайтуӆаӈа’’. Таньше мэма хома шеӆ, ӈяхядя таӆям нятапётан хайноӆта’’ нена’’ меӆ нэхэӆты’’. Хайтуӆаш мэмытуӈ дяӆнасатуӈ пускохот маскировочный’ шентми’’ поӈкахат паӈкаӆпи’’.
Ӈашкиуде’’ маньшту’’, хаймыхина мэна нена’’ ӈопшеӆ хома шоньшахана нятапётӈама’’, чикехена хома ӈайты. Таттама: Лариса Айваседо таттамы
Таӆьша’’ ӈамыко’’ хайноӆта’’хана ӈупчики ӈаӆкамана таӆаӈа’’. Чикиӈ камна школа-интернатхана мансӆанна’’ хаймыхина мэнаха’’ ӈайтаптавсутатоӈ, матоӆьш мэта’’ ӈамыдю’’ ӈомтамай’’. Шаӈкмян шеӆтамайтуӈ ӈомтамайтуӈ ӈамыдётоӈ Пюӆ дяханана ӈайта штабан #МыВместе канаштутуӈ.
Лариса Айваседо патмы