Быйыл яҙ иртә килде, ни арала бейек ҡар көрттәре иреп юҡҡа сыҡты, күлдәй йәйрәп ятҡан күләүектәр кипте. Яландарҙа йылы яҡтан ҡайтҡан ҡоштар тауышына трактор гөрөлдәүе ҡушылды. Аграрийҙар өсөн яуаплы осор башланды. Быйыл Мәләүез районы буйынса күп йыллыҡ үләнде ашлау - 5741, ужым сәсеүлеген - 10157 гектарҙа, ә баҫыу майҙанын дымға ҡаплатыу 42700 гектарҙа атҡарыу бурысы тора. Бар хужалыҡтарҙа ла сәсеүлек материалын ағыулау бара, бөгөнгә 40,3 проценты (2810 тонна) эшкәртелгән. 708 гектар майҙанды биләгән күп йыллыҡ үләндәрҙе өҫтәмә туҡландырыуҙы Салауат исемендәге хужалыҡ тамамлай яҙған, унан ҡала “Ашҡаҙар” яуаплылығы сикләнгән йәмғиәте килә. Крәҫтиән-фермер хужалыҡтары ла елләгән баҫыуҙарға техника сығарҙы. Ужым культураларын салауаттар 39,9 процент майҙанда ашлап өлгөргән, әле дымға ҡаплатыуҙа, дымдан һурыҡҡан баҫыуҙарҙы тырмалау эштәрендә. Ҡояш менән ел тиҙ арала ерҙәге дымды осорта, шуға ла көндөң һәр сәғәте ҡәҙерле. Юҡҡа ғына боронғолар, яҙын сәсһәң, һаҙға сәс тип әйтмәгән.