Телемедицина ярҙамға килә

Һуңғы өс йыл эсендә Башҡортостанда телемедицина технологияларын үҫтереү буйынса һиҙелерлек үҫеш һиҙелә. 2019 йылда 12,6 меңдән ашыу телемедицина консультацияһы үткәрелһә, 2020 йылдан был һан ете тапҡырға артты. Былтыр табиптар тарафынан 92 980 телемедицина консультацияһы үткәрелде. Айырыуса уларҙың һаны онкология профиле буйынса артты. 2017 йылда Һаулыҡ һаҡлау министрлығы тарафынан Республика медицина мәғлүмәт-аналитика системаһы булдырылды. Уға тәүге медик-санитар ярҙам күрһәтеүсе өс кимәлдәге бөтә дәүләт медицина ойошмалары ла инә ала. Был система ярҙамында медицина мәғлүмәттәре менән оператив рәүештә алмашырға, пациенттың электрон картаһындағы мәғлүмәттәр менән дә танышырға мөмкин. Консультацияға бөтә йүнәлештәр һәм тикшереү һөҙөмтәләре бары электрон рәүештә рәсмиләштерелә. Бынан тыш, республика медицина ойошмаларының бөтә территориаль структура подразделениелары менән әүҙем эш алып барыла. Был фельдшер-акушерлыҡ пункттарын дистанцион ярҙам менән тәьмин итергә мөмкинлек бирҙе. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһының маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.