Ылыҫлы ағастарҙың, бигерәк тә ҡарағайҙың тын юлдары сиренән яфаланғандар өсөн ни тиклем файҙалы икәнен беләбеҙ. Күп шифаханалар янына юҡҡа ғына ошо ағастарҙы ултыртмайҙар. Ҡарағай бөрөһөн йәки әле генә бөрөләнеп килгән йәш тубырсыҡтарҙы үҙебеҙгә лә йыйып алып, төрлө шифалы дарыу, ҡайнатмалар эшләргә мөмкин. Әле ҡарағай бөрөһө йыйыу өсөн иң уңайлы мәл. Был осорҙа улар сайырлы, йәбешкәк, йәшел генә һәм хуш еҫле була. Һәм шифалы матдәләре иң ныҡ туплаған сағы. Бөрөләрҙе йәки яңы ғына тумарланып килгән тубырсыҡтарын бирсәткә кейеп, ҡайсы менән ҡырҡып алығыҙ, сөнки ҡулға йәбешкән сайыр тиҙ генә йыуылмаясаҡ. Ҡарағай тубырсығынан ҡайнатма эшләү өсөн уның бармаҡ башындай ғына тубырсыҡтарын ике килограмм йыябыҙ. Ике литр һыуҙа ярты сәғәт тирәһе ҡайнатҡас, ике килограмм шәкәр ҡомо өҫтәп, барлығы ике сәғәт талғын утта ҡайнатырға кәрәк. Аҙаҡ банкаларға һалып, һыуытҡыста һаҡлағыҙ. Ҡышҡы һыуыҡтарҙа һалҡын алдырғанда, йүтәлләгәндә был ҡайнатма бигерәк тә файҙалы һәм шифалы. Уны шулай уҡ төрлө үлән сәйҙәре менән ҡушып эсергә лә мөмкин. Әйткәндәй, сит илдәрҙә булғанда ҡарағай тубырсығына бал һалынған ҡайнатманы ауыҙ итергә тура килде. Тимәк, шулайтып та эшләп ҡарарға мөмкин. Ә ҡарағай бөрөһөн күптәр бронхиттан дауаланыу өсөн ҡуллана. Биш йөҙ грамм спиртҡа ҡарағайҙың һигеҙ бөрөһөн һалып, уны өс аҙна самаһы ҡараңғы урында тоторға кәрәк. Аҙаҡ һөҙөп алып, иртәнсәк ас ҡарынға өс балғалаҡ эсергә тәҡдим ителә. Дауаланыу бер ай тирәһе бара. Шулай уҡ ныҡ сәсәгәндәргә, йүтәлдән яфаланғандарға ла уны ҡулланыу рөхсәт ителә. Ҡарағай бөрөләре менән элегерәк хатта туберкулез сирен дә дауалағандар. Бындай халыҡ алымдарын ҡулланыр алдынан ошо ҡатнашмаларға аллергияғыҙ юҡмы икәнлеген тикшерегеҙ. Шулай уҡ табип менән кәңәшләшергә онотмағыҙ. Фото: 1000.menu