Күңелдәргә шатлыҡ бирәИзге Рамаҙан,Оноттора бар ҡайғыныИ, изге аҙан.Нурҙан ғына тора кеүек –Донъялар яҡты,Уйлана белгән кешенеңИманы артты. (Гүзәл Ситдиҡова). Хөрмәтле ҡәрҙәштәр, әл-хәмдү лил-ләһ, изге Рамаҙан айына аяҡ баҫтыҡ. Ошо уңайҙан һәммәгеҙҙе лә ихлас тәбрикләп, ураҙа мөбәрәк булһын, барыбыҙға ла Раббыбыҙҙың рәхмәтенә өлгәшергә яҙһын ине, тип теләйбеҙ. “Эй, иман килтергән һөйөклө бәндәләрем! – тиелгән изге Ҡөрьәндә. – Һеҙгә ураҙа ғибәҙәте фарыз ителде, тәҡүәлек ҡылығыҙ”. Ошо бойороҡҡа ярашлы, Рамаҙанда һәммәбеҙ ҙә Аллаһ Тәғәләнең рәхмәтенә өлгәшергә ынтылырға тейешбеҙ. Изге айыбыҙ емеш-еләккә бай йәй кеүек: ҡушылған ғәмәлдәрҙе үтәгән әҙәм балаһы мул сауап ала. Раббыбыҙ ҡылған изгелектәргә рәхмәтте арттырып бирә. Рамаҙан – тәрбиә мәктәбе. Унда фарыз ителгән ғәмәлдәр дөрөҫ йәшәү юлын күрһәтә. Әйтәйек, “Кем дә кем ураҙа тотоп та, ялған һүҙҙән айырылмаһа, Аллаһ Тәғәлә уның ас йөрөүенә мохтаж түгел”, – тигән пәйғәмбәребеҙ Мөхәммәт ғәләйһис-сәләм. Ғөмүмән, Исламда һәр нәмәне уйлап һөйләү зарурлығы тәҡрар ителгән. “Мосолмандың иң күркәм сифаттары шул: мәғәнәле, аңлайышлы, кешенең күңелен ҡырмаҫлыҡ итеп һөйләр, ә инде кемдер һүҙ тота икән, уны матур итеп тыңлай белер”, – тигән Пәйғәмбәребеҙ. Уның “Мосолман башҡаларға ҡулы менән дә, теле аша ла зарар килтермәҫ” тигән һүҙҙәрендә лә бөйөк аҡыл ярылып ята. Раббыбыҙҙың рәхмәтен алыу юлында һәр беребеҙгә тәҡүәлек, сабырлыҡ, сыҙамлыҡ насип әйләһен. Аллаһ Тәғәлә ураҙабыҙҙы, ғибәҙәттәребеҙҙе ҡабул итһен, һәр ғаиләгә рәхмәтен, бәрәкәтен насип ҡылһын, доғаларыбыҙ яуап алһын, иншаллаһ. Изгелек игеп, яҡшы эштәр башҡарып, мәрхәмәтлек, шәфҡәтлелек күрһәтеп, тормошобоҙҙо нурға күмәйек. Амин. Һеҙҙең иғтибарға изге айҙағы сәхәр, ифтар ваҡыттары ингән намаҙ уҡыу мәлдәре таблицаһын тәҡдим итәбеҙ. Фото: "Дини тәҡүим" китабы.