Әлеге чарада журналист һәм "Муса Гәрәев. Биеклектән - бөеклеккә" китабы авторы Зөһрә Исламова катнашты.Чара "Китап. Вакыт. Без" дип аталган Уфа балалар һәм үсмерләр китабы атналыгы-2023 кысаларында узды. "Герой көне" исеме астында узган очрашуга Уфаның 5нче лицееның бишенче сыйныф укучылары чакырулы иде.Журналист укучыларга "Кызыл таң" гәзите хакында сөйләде, балалар өчен чыгып килүче "Әллүки" журналы белән таныштырды. Мәктәп укучылары бу чара алдыннан "Муса Гәрәев. Биеклектән - бөеклеккә" китабының эчтәлеге белән алдан танышкан. Сыйныф сәгатендә ике тапкыр Советлар Союзы Герое Муса Гәрәевның биографиясе, сугыш чоры һәм тормышы хакында да укып, Интернет челтәрләре аша да мәгълүмат алган.Очрашу вакытында Зөһрә Исламова балаларга Муса Гәрәев хакында, аның биографиясе, тормышына кагылышлы кызыклы фактларны сөйләде. Очрашу җанлы аралашу форматында барып, Муса Гәрәев хакындагы кино, буклетлар күрсәтелде. Укучылар Зөһрә Исламовага журналист эше, китап язу серләре турында, шәхси тормышы хакында да кызыклы һәм көтелмәгән сорауларны бер-бер артлы биреп торды. Анна Бережная җитәкчелегендәге бишенче сыйныф укучыларының киң эрудицияле, яхшы белемгә ия балалар икәнлеге аларның үз-үзләрен тотышында да, биргән сорауларында да сизелде. Ә инде чара ахырында укучылар Муса Гәрәевка багышлап язылган шигырьләрне яттан сөйләде.Зөһрә Исламова үз чыгышы ахырында балаларга: "Гаиләгезне, белем алган мәктәбегезне, Башкортстаныбызны, ватаныбызны Муса Гәрәев үрнәгендә яратыгыз! Кеше үз илен яратканда гына бәхетле була", - диде.Әлеге китапханәдә ватанпәрвәрлек хисен тәрбияләү максатыннан төрле чаралар әледән-әле үткәрелеп тора.- Шушындый очрашулар үсеп килүче буынны ватанпәрвәрлек хисендә тәрбияләүдә мөһим роль уйный. Киләчәктә дә шушы юнәлештә эшебезне дәвам итәчәкбез, - диде Уфа шәһәре 22нче балалар китапханәсе мөдире Зөлфия Гыйззәтуллина.Фото: Зөлфия Гыйззәтуллина.