Башкалада – Халыкара форум!

“Агрокомплекс” — республика авыл хуҗалыгы тармагында Русия һәм чит илләр дәрәҗәсендә колачлы чара булган бердәнбер күргәзмә. Аның географиясенең һәм мәртәбәле күргәзмәдә катнашучылар санының елдан-ел арта баруы, көнбатыш илләре санкцияләре шартларында аеруча мөһим. Әлеге күргәзмәнең гомум мәйданы 17,6 мең квадрат метрга җиткән һәм бу ВДНХ тарихында тәкъдим ителгән иң зур мәйдан булып билгеләнгән.“ВДНХ — Экспо” алдындагы 9 мең квадрат метрда 180 берәмлектән артык авыл хуҗалыгы техникасы урнаштырылган.— “Агрокомплекс” күргәзмәсе чын мәгънәсендә Русиянең аграр тармак казанышларын тәкъдим итү һәм тәҗрибә уртаклашу башкаласына әверелде. Бу безгә зур җаваплылык өсти, — диде республика Хөкүмәте вице-премьеры, авыл хуҗалыгы министры Илшат Фазрахманов журналистлар белән очрашуда. — Ул ел саен үз мәйданына Русиянең һәм чит илләрнең әйдәүче предприятиеләре җитәкчеләрен һәм белгечләрен, бизнес һәм финанс структурасы вәкилләрен җыя. Традиция буенча, быелгы очрашуда да тармакка инвестиция салуны үстерү, перспективалы инновацион проектлар буенча көн кадагындагы мәсьәләләрне уртага салып тикшерербез, фикер алышырбыз, дип ышанам. Шунысы да игътибарга лаек, Башкортстан башкаласында узган традицион күрсәзмәдә быел чит ил компанияләренең күбрәк катнашырга теләве куандыра. Әлбәттә, Халыкара форумның төп вакыйгасы — Русия авылының киләчәге һәм яшь лидерларны тәрбияләү проблемаларына багышланган пленар утырыш. Биредә аграр тармакны яңа технологияләр белән коралландыру, авыл хуҗалыгын квалификацияле белгечләр белән тәэмин итү, анда эш урыннары һәм якын киләчәктә тармак алдында торган бурычлар турында җентекле сөйләшү көтелә. — Быелгы күргәзмә һәм форум, элекке еллар белән чагыштырганда, көтелмәгән дәрәҗәдә популяр булуы белән аерылып тора. Күргәзмә мәйданында тәкъдим ителәсе урыннар ике ай элек үк тулган иде. Өстәмә мәйданчыкларны да файдаланырга булдык. Без, шулай ук, мәртәбәле чарага килүчеләр санының 20 мең кешегә җитү ихтималын фаразлыйбыз. Быелгы Халыкара форумның тагын бер үзенчәлеге бар: башкалабызга Идел буе федераль округы һәм башка төбәкләрдән төрле тармаклар буенча 20гә якын министрның килүе көтелә, — ди Башкортстан Күргәзмәләр компаниясе җитәкчесе Альбина Килдегулова.Ел саен үткәрелүче мондый чараларда, гадәттә, яңа җитештерү предприятиеләрен ачу тантанасы да бәйрәмгә ямь өсти иде. Быел форум кунаклары белән берлектә видеоэлемтә аша Минск трактор заводының бүлендек компаниясе — Мозырск машина төзү заводы белән берлектәге “Фермер РБ-2103” чылбырлы тракторлар җыю участогы эшенә старт биреләчәк. Әлеге предприятие Уфа районында урнашкан. Шулай ук, “Башагромаш” предприятиесенең Стәрлетамак районында үзйөрешле “Чулпан 100” чапкычын җыю цехын “туры эфир” аша ачу да республиканың аграр елъязмасында мөһим вакыйгаларның берсе булачак.Илшат Фазрахманов сүзләренә караганда, быел тулы комплект белән җыелачак 100 берәмлек техника аграрийлар өчен зур бүләк булачак. “Чулпан” чапкычы чит илдәге төрдәш техникадан бер ягы белән дә калышмый. Халыкара күргәзмә һәм форум эше 4 көн дәвам итәчәк. Программаларда “түгәрәк өстәл”ләр, тематик дискуссия утырышлары һәм төрле конкурслар үткәрү каралган. Федераль һәм төбәк сатып алу сәүдә челтәрләре катнашлыгында ике конференция һәм башка очрашулар планлаштырыла. Аларда Русия һәм Беларусь Республикасының 23 төбәгеннән 363 спикер чыгыш ясаячак.Олег Төхвәтуллин.