Махсус хәрби операцияла ҡатнашыусыларҙың ғаиләләре нисек йәшәй? Уларҙың Ватан һағындағы улдары борсолмаһын өсөн ауылдаштар ниндәй иғтибар һәм ярҙам күрһәтә? Ут эсендә йөрөгән улдарҙың да әсәйҙәренең нисек йәшәүе тураһында уйланмауы мөмкин түгел. Стәрлебаштар был йәһәттән яңғыҙ ҡалған әсәләрҙе хәстәрлек менән солғарға тырыша. Хәрби Алмас Йәһүҙиндең әсәһе Сафыя Әхмәҙулла ҡыҙы бер үҙе генә йәшәй. Мобилизация башланғанға тиклем үк улы үҙе теләп хәрби операцияға китергә ҡарар итә. Ошондай маҡсат менән Чечняға китә һәм “Әхмәт” махсус подразделениеһына инергә әҙерләнә. Медицина комиссияһы үтеп йөрөгәндә илдә өлөшләтә мобилизация иғлан ителә. Яҡташтары менән ошо тулҡынға эләгәләр. Ул медицина зонаһында хеҙмәт итә, яралыларҙы һуғыш яланынан алып сыға, тәүге медицина ярҙамы күрһәтә. Сафыя Әхмәҙулла ҡыҙының хужалығы ҙур түгел, ул кәзәләр һәм тауыҡтар аҫрай. Әммә ауыл ерендә һәр саҡ ир-ат ҡулы кәрәк, мәшәҡәттәр табылып ҡына тора. Ҡышҡа табан һарайҙы ремонтлау кәрәклеге килеп сыҡҡас, был хәстәрлекте фермер хужалығы етәксеһе Фәнзил Ғәлиуллин үҙ өҫтөнә ала. Материал менән Стәрлетамаҡ ауыл хужалығының Стәрлебаш участкаһы хеҙмәткәрҙәре ярҙам итә. Фермер төҙөлөш материалдарын илтеүҙе ойоштора, ремонт өсөн түләүҙе үҙ өҫтөнә ала. Стәрлебаштар тормоштоң яңы үҙгәрештәренә күнекте. Ауылдаштар араһында хәрбиҙәр һәм уларҙың ғаиләләре тураһында хәстәрлекте өҫтәренә алған, битараф булмаған, ярҙамсыл кешеләрҙең ифрат күплеге һөйөндөрә, тип яҙа “Стәрлебаш шишмәләре”. Барыһына ла ысын күңелдән рәхмәт! Фото: “Стерлибашевские родники”.