Юлдарҙағы соҡорҙо ямау күптәрҙе борсой

Башҡортостандың Сәнәғәт һәм энергетика министрлығы 2023 йылда сәнәғәт производствоһы үҫешен өс процентҡа тәьмин итеү бурысын ҡуя. Ошо хаҡта Башҡортостан Башлығы Радий Хәбиров уҙғарған аҙналыҡ оператив кәңәшмәлә һүҙ барҙы. Кластерҙарҙы үҫтереү буйынса эште көсәйтеү, технологик суверенитетты нығытыу – тармаҡтың өҫтөнлөклө бурыстары иҫәбендә. Был хаҡта республиканың сәнәғәт, энергетика һәм инновациялар министры вазифаһын башҡарыусы Тимур Герасимов һөйләне. Был принциптар 9 мартта Туймазыла төбәктең Сәнәғәт һәм энергетика министрлығы коллегияһы ултырышында тәҡдим ителгән Башҡортостан сәнәғәтен стратегик үҫтереү концепцияһының нигеҙенә ятты. Бынан тыш, министрлыҡ донъя кимәлендәге Евразия ғилми-белем биреү үҙәге менән берлектә стратегик сессия ойошторорға планлаштыра. Унда ғилми берләшмә һәм төп предприятиелар вәкилдәре ҡатнашасаҡ. Улар бергәләп фәнни-технологик үҫеш, шул иҫәптән импортты алмаштырыу мәсьәләләре буйынса ҡарарҙар тәҡдим итәсәк. Башҡортостан ҡатмарлы санкция баҫымы осорон лайыҡлы үтә, тип билдәләне Радий Хәбиров. Индустриаль сектор тотороҡло үҫешә, уҙған йыл йомғаҡтары буйынса сәнәғәт етештереүе үҫеше 2,7 процент тәшкил итте. – Предприятиеларыбыҙҙың нисек эшләүе ҡыуандыра. Ике йыл рәттән республика сәнәғәт сәйәсәтен тормошҡа ашырыу һөҙөмтәлелеге рейтингында беренсе урынды биләй, – тине Радий Хәбиров. – Яҡын арала “Сәнәғәт сәғәте” ултырышын үткәрәсәкбеҙ, унда быйыл тармаҡты үҫтереү мәсьәләләрен тикшерәсәкбеҙ. Кәңәшмәлә “Инцидент менеджмент” системаһына килгән мөрәжәғәтәр тураһында ла һүҙ булды. Социаль селтәрҙә 4846 мөрәжәғәт теркәлгән, был алдағы аҙна менән сағыштырғанда 1427-гә әҙерәк. Был турала Башҡортостан Башлығының социаль коммуникациялар буйынса идаралығы етәксеһе Елена Прочаковская хәбәр итте. Халыҡты борсоған биш тема иҫәбендә – юлдар (1 184 мөрәжәғәт), төҙөкләндереү (789), торлаҡ-коммуналь хужалыҡ (655), йәмәғәт транспорты (533), һаулыҡ һаҡлау (392). Юлдарҙа ҡар таҙартыу эштәренә мөрәжәғәттәр аҙайған. Республика халҡы башлыса соҡорҙарҙы ямау һәм юлдар төҙөү кәрәклеге тураһында яҙа. Мөрәжәғәттәрҙең күбеһе - Өфөнән (102), Стәрлетамаҡтан (24) һәм Октябрьскийҙан (22). Халыҡты төҙөкләндереү өлкәһендә ихата биләмәләрен һәм тротуарҙарҙы ҡарҙан таҙартыу, шулай уҡ ихаталарҙағы юлдарҙы ремонтлау мәсьәләләре борсой. Торлаҡ-коммуналь хужалыҡ буйынса - өй баштарындағы боҙ һәм ҡар, шулай уҡ температураның күтәрелеүе сәбәпле ҡыйыҡтарҙан һыу ағып төшөүе. Йәмәғәт транспорты буйынса мөрәжәғәттәр күбәйгән, был автобустарҙың ҡайһы бер маршруттарын туҡтатыуға һәм үҙгәртеүгә бәйле. Башҡортостан Республикаһы Башлығы Радий Хәбиров доклад йомғаҡтары буйынса профилле ведомстволарға һәм хеҙмәттәргә юлдарҙағы соҡорҙарҙы ремонтлауға ҙур иғтибар бүлергә ҡушты. – Әүҙем эшләргә әҙер булығыҙ, соҡорҙарҙы ямау тураһында ваҡытында хәбәр итегеҙ, - тине Радий Хәбиров. Фото: Башҡортостан Башлығы сайты.