Սաուդյան Արաբիայի թագավոր Սալման բեն Աբդել Ազիզ Ալ Սաուդը Իրանի նախագահ Էբրահիմ Ռաիսիին հրավիրել է Էր Ռիադ։ Այս մասին ТАСС -ի փոխանցմամբ՝ կիրակի հայտնել է Իրանի նախագահի վարչակազմի քաղաքական հարցերով փոխղեկավար Մոհամմադ Ջամշիդին։
«Սաուդյան Արաբիայի թագավոր Սալման բեն Աբդել Ազիզը, ողջունելով երկու եղբայրական երկրների միջև դիվանագիտական հարաբերությունների վերականգնման մասին համաձայնագիրը Ռաիսիի նախագահին ուղղված նամակում, նրան պաշտոնական այցով հրավիրել է Էր Ռիադ և կոչ արել ամրապնդել տնտեսական և տարածաշրջանային համագործակցությունը», - Ջամշիդիի խոսքը մեջբերում է Tasnim գործակալությունը: Նրա տեղեկություններով՝ հանրապետության նախագահն ընդունել է Սաուդյան միապետի հրավերը։
Մարտի 10-ին Սաուդյան Արաբիան և Իրանը պայմանավորվել են դիվանագիտական հարաբերությունների վերականգնման և երկու ամսվա ընթացքում դեսպանատների աշխատանքի վերսկսման մասին: Երկու երկրների ներկայացուցիչները մի քանի օր Պեկինում բանակցություններ են վարել, որոնց արդյունքում պատրաստվել է եռակողմ հայտարարություն։
Էր Ռիադի և Թեհրանի միջև հարաբերությունները սրվել էին 2015-ի մարտին՝ Սաուդյան Արաբիայի գլխավորած կոալիցիայի ռազմական գործողության մեկնարկով Եմենի տարածքում «Անսար Ալլահ» շարժման դեմ: 2016-ի հունվարին այն բանից հետո, երբ Թեհրանում Սաուդյան Արաբիայի դեսպանատունը և Մեշհադում նրա հյուպատոսությունը ենթարկվեցին ցուցարարների հարձակմանը, որոնք վրդովված էին Ռիադում շիա հայտնի քարոզիչ շեյխ Նիմր ան-Նիմրի մահապատժից, թագավորությունը խզեց դիվանագիտական հարաբերությունները Իրանի հետ: