Ադրբեջանի նախագահ Իլհամ Ալիևը հայտարարել է, որ Հայաստանը պետք է ընդունի Բաքվի պայմանները, եթե ցանկանում է «հանգիստ ապրել» 29 հազար քառ. կմ տարածքում:
«Որպեսզի Հայաստանը հանգիստ ապրի 29 հազար քառ. կմ տարածքում, կա մեկ պայման՝ ընդունել մեր պայմանը՝ պաշտոնապես ճանաչել Ղարաբաղը որպես Ադրբեջանի տարածք, մեզ հետ կնքել խաղաղության պայմանագիր և դելիմիտացիայի աշխատանքներ իրականացնել մեր պայմանների համաձայն», - Ալիևին մեջբերում են ադրբեջանական ԶԼՄ-ները:
Նա նաև հայտարարել է, որ եթե Երևանը չի ճանաչում Ադրբեջանի տարածքային ամբողջականությունը, ապա Բաքուն էլ չի ճանաչում Հայաստանի տարածքային ամբողջականությունը։
Ավելի վաղ Հայաստանի ԱԳՆ-ն հայտարարել էր, որ Անկարայում թյուրքական պետությունների կազմակերպության գագաթնաժողովում Ադրբեջանի նախագահի հայտարարությունները տարածքային հավակնությունների և Հայաստանի դեմ հերթական ագրեսիայի նախապատրաստման ակնհայտ դրսևորում են: