Ҡырмыҫҡалы ауылындағы физкультура-һауыҡтырыу комплексында Башҡортостан Республикаһы XXV Уҡыусылар спартакиадаһы егеттәре араһында мини-лапта буйынса төбәк ярыштары булды. Унда беренселекте Ҡырмыҫҡалы ауылындағы 2-се урта мәктәптең физкультура уҡытыусыһы Ринат Яхин етәкселегендәге команда яуланы. Икенсе урынға – Нуриман, өсөнсөгә Иглин командалары сыҡты. Рус лаптаһы ҙур популярлыҡ яулаған спорт төрҙәренең береһе һаналмаһа ла, республикабыҙҙа уның менән шөғөлләнеүселәр, хатта ил күләмендә призлы урын яулағандар байтаҡ. Был үҙенсәлекле спорт төрөнөң төп маҡсаты – уйынсы юғарыға ырғытҡан тупты бита менән ҡаршы яҡҡа булдыра алған тиклем алыҫҡараҡ һуғып, ҡаршы яҡҡа йүгерергә, ә ҡаршы яҡтар тупты тотоп йүгереүсегә тейҙерергә тейеш. Уңышлы йүгереп килгән өсөн командаға мәрәй өҫтәлә. Тейешле ваҡыт эсендә күберәк мәрәй йыйған команда еңеүсе була. Республикабыҙҙа был спорт төрө үткән быуаттың 30-сы йылдарында үҫешә һәм бигерәк тә мәктәп уҡыусылары араһында киң тарала. Рус лаптаһының бер төрө булған мини-лаптала бишәр кешенән торған ике команда ҡатнаша. Уларҙың берәүһе һаҡлана, икенсеһе һөжүм итә. Айһылыу НИЗАМОВА