Беҙҙең халыҡта аҙыҡты бер нисә көнгә етерлек итеп, күберәк әҙерләргә күнегелгән. Тик бына ҡайһы бер ризыҡты шул уҡ көндө ашарға кәрәк икәнлеген беләһегеҙме? Икенсе көндө улар һаулыҡ өсөн зыянға әйләнә. Бына улар: Йәшелсә салаты. Ғалимдар әйтеүенсә, киҫелгән һәм таҙартылған йәшелсәне 4 градустан юғарыраҡ температурала 12 сәғәттән дә ашыу һаҡларға ярамай. Тимәк, һыуытҡыс та ярҙам итмәйәсәк. Шулай булғас, йәшелсәне йә бер ашарлыҡ итеп әҙерләргә, йә туңдырырға кәрәк. Оҙаҡ һаҡланыу сәбәпле барлыҡҡа килгән нитраттар организмға зыян килтерә. Ашҡаҙан-эсәк юлында проблемалар тыуҙыра, хатта яман шеш булдырыу хәүефе янай. Дөгө. Бөйөк Британияның Аҙыҡ-түлек стандарттары агентлығы билдәләүенсә, сей дөгө ярмаһында бактерияларҙың бик күп хәүефле споралары бар. Дөгө бешергәндә уларҙың күпселеге һәләк була, әлбиттә. Ләкин, миҫал өсөн, тупраҡтан дөгө ярмаһына ингән ҡайһы бер төр бактериялар тере ҡала. Бер нисә көнгә ҡалдырылған дөгө ярмаһында уларҙың споралары терелә һәм үҫешә. Бындай дөгө ағыуланыуға, ҡоҫоуға, эс китеүгә, эс ауыртыуға килтереүе мөмкин. Бүлмә температураһында дөгө ярмаһы бик тиҙ боҙола. Шуға күрә уны күп бешергәнһегеҙ һәм ташларға теләмәһәгеҙ, аҙыҡты һыуытҡысҡа йәки туңдырғысҡа алып ҡуйыу яҡшыраҡ. Майонезлы салаттар. Байрамдарға хужабикәләр, ғәҙәттә, майонезлы салаттар әҙерләй. Улар, ҡағиҙә булараҡ, ике-өс көн һаҡлана. Был етди ағыуланыуға килтереүе ихтимал. Майонезлы салаттарҙы ике градустан дүрт градусҡа тиклем температурала ла һыуытҡыста бер тәүлектән артыҡ һаҡларға ярамай. Айырыуса уларҙы бүлмә температураһында оҙаҡҡа ҡалдырыу хәүефле. Роспотребнадзорҙың Мәскәү өлкәһе буйынса идаралығының туҡланыу гигиенаһы буйынса күҙәтеү бүлеге начальнигы Надежда Раева майонез салаттарын әҙерләнгәндән һуң 12 сәғәт үткәс ҡулланырға ярамай, ти. Әлфиә МИНҒӘЛИЕВА