Был матур гөлдө күп хужабикәләр үҫтерергә ярата, тик уның ҡайһы саҡта оҙаҡ сәскә атмауы кәйефте ҡыра. Тәжрибәле баҡсасыларҙың әйтеүенсә, йорт шарттарында гөлдөң сәскә атмау сәбәптәре төрлө. Кактустар ғаиләһенә ҡараған “декабрист” сәскә үҫтереүселәрҙе йылына бер тапҡыр матур сәскә таждары менән һөйөндөрөргә тейеш тә баһа! “Көйһөҙлөк” сәбәптәре нимәлә һуң? Йәй уртаһында сәскә атмай тип көйәләнмәгеҙ, сөнки ул ғәҙәттә декабрь аҙағында ( шуға ла ул”декабрист “ атамаһын алған), сортына ҡарап, ноябрь айында йәки яҙ уртаһында сәскә атыуы ихтимал. Ә ысын кактус тик декабрҙә һеҙҙе һөйөндөрөр. Был гөлгә бик аҙ дым кәрәк, тип уйлағандар яңылыша, сөнки ул тропик урмандарҙа йәшәй һәм даими тәрбиәләгәнде, ваҡытында һыу һипкәнде ярата. Тик һәр нәмәлә сама кәрәк, артыҡ һыу ҡойоу арҡаһында тамырҙарҙың сереүе, тупраҡта бөжәктәр үрсеүе мөмкин. Тупраҡтың өҫкө ҡатламы тулыһынса кипкәс кенә һыу һалығыҙ. Асыҡ һауала үҫтергәндә өс-дүрт көн аша һыу һибеү ҙә етә. Сәскә атһын өсөн октябрь айынан башлап һыу һибеүҙе кәметегеҙ, айына бер тапҡыр ғына ҡойоғоҙ. Сәскә атҡандан һуң элекке режимға күсегеҙ. Сәскә атмауҙың тағы бер сәбәбе – уны артыҡ яҡты урынға ҡуйыуҙа. Гөл тура төшкән ҡояш нурҙарын яратмай. Кактусығыҙ көн һайын кәм тигәндә 12 сәғәт ҡараңғыла торорға тейеш. Яһалма яҡтыртыу уның үҫеш циклын боҙоуы мөмкин. Иң яҡшы һауа температураһы Цельсий буйынса 15 градус тәшкил итергә тейеш. 25 градустан юғары булғанда, бөрөләре ҡойолоуы ихтимал. Тағы ла бер кәңәш – тамыры нығынһын өсөн йәш үҫемлекте өс йылға тиклем күсереп ултыртырға ярамай. Уның бер нисә йыл буйына бер үк һауытта үҫеүе яҡшы. Һабаҡтарында сәскә бөрөләре күренһә, урынынан күсермәҫкә кәрәк. Һауыты ҙур булһа, тамырҙары нығыр, әммә сәскә атыуын тотҡарлауы ихтимал. Тағы ла шуныһы, ысын декабрист гөлө сәскә атҡандан һуң да йәшәүен, үҫеүен дауам итә. Ул йортҡа йәм биреүсе бына тигән үҫемлек. Дөрөҫ тәрбиәләгәндә һәм тейешле иғтибар биргәндә, ул һеҙҙе оҙаҡ йылдар матурлығы менән һөйөндөрәсәк әле. Фото:электронный журнал цветовода.