Йәш шайморатовсылар шәмдәр эшләгән

Рәшит Солтангәрәев исемендәге Яңы Таймаҫ ауылы гимназияһында бишенсе класта белем алыусы шайморатовсылар менән танышыу форсаты тейҙе. Ун бер уҡыусы: алты ҡыҙ һәм биш малай үткән йылдың сентябренән ошондай маҡтаулы һәм яуаплы исемде йөрөтә. Уларҙың кураторы йәшәйеш хәүефһеҙлеге нигеҙҙәре фәне уҡытыусыһы Раил Араптанов әйтеүенсә, был класс башҡаларҙан төрлө яҡлап айырыла. – Беренсенән, барыһы ла яҡшы уҡый. Икенсенән, спорт менән шө­ғөл­ләнәләр, баскетбол, футбол уйнайҙар, саңғы ярыштарында ҡат­нашалар. Тарих менән дә ҡыҙыҡ­һыналар. 112-се башҡорт кавалерия дивизияһында ҡатна­шыусы яугирҙәр беҙҙең Таймаҫ ауылынан да булған. Уларҙың балалары менән осрашыуҙарға йөрөйҙәр. Музейҙарға ла экскурсия ойошторолоп тора. Башланғыс хәрби әҙерлек буйынса ла белемдәрен камиллаштыралар. Автоматты һү­теп-йыйыу кеүек хәрби оҫталыҡҡа ла өйрәнәләр. Ғөмүмән, рухи һәм физик яҡтан үҙҙәрен нығыталар, – тип һөйләне уҡытыусылары. Махсус хәрби операцияла ҡатнашҡан һалдаттарға шәмдәр әҙерләүҙәре менән дә һоҡлан­дырҙы Көйөргәҙе шайморатовсылары. Балаларҙың үҙ ҡулдары менән эшләгән шәмдәре күптән түгел хәрбиҙәргә оҙатылған. – Шайморатовсылар класында уҡыуым менән ғорурланам. Яҡшы уҡырға, спорт менән шө­ғөлләнергә тырышам. Көслө булып үҫер өсөн саңғыла йөрөйөм, баскетбол уйнайым, ат ярышында ла ҡатнашҡаным бар. Киләсәккә хыялым ветеринар һөнәренә уҡып сығып, ауылыма ҡайтып йәшәү, – тине шаймо­ратовсы­ларҙың береһе Артур Мәжитов. Балаларҙың күңеленә тыуған еренә ҡарата һөйөү орлоғо һалыуҙы ла маҡсат итеп ҡуя ошондай кластар ойоштороу. Резеда ШӘҢГӘРӘЕВА